ომბუდსმენი მოქალაქეების ნარკოლოგიური შემოწმების წესის შეცვლას ითხოვს

სახალხო დამცველი საკონსტიტუციო სასამართლოს გზით ითხოვს აიკრძალოს დღეს მოქმედი წესი, რომლითაც ადამიანს ნარკოტიკული საშუალებით თრობა უდგინდება, ომბუდსმენის შეფასებით ეს ადამიანის უფლების შემლახველია.

სახალხო დამცველის აპარატმა ამ ცვლილების მოთხოვნით საკონსტიტუციო სასამართლოს უკვე მიმართა და მოსამართლის გადაწყვეტილება უახლოეს დროში გახდება ცნობილი.

„ეს წესი არაკონსტიტუციურია, რადგან ღირსებისშემლახავ პირობებში ხორციელდება მისი აღსრულება. პრობლემურია იმიტომ, რომ ადამიანებს უწევთ თავის თავის წინააღმდეგ ბიოლოგიური მასალის ჩაბარება. ასევე პრობლემურია იმ თვალსაზრისით, რომ ეს თავისუფლების გარკვეული შეზღუდვაა“, - აცხადებს სააგენტო „ინტერპრესნიუსთან“ სახალხო დამცველის მოადგილე გიორგი ბურჯანაძე.

ცნობისთვის, იანვარ-აგვისტოში ნარკოლოგიური შემოწმება საქართველოში სულ 6 675 ადამიანმა გაიარა და მათგან 3 628 პირს დადებითი შედეგი დაუდგინდა.

2017 წლის სტატისტიკის მიხედვით კი ნარკოტესტირებაზე გადაყვანილების ნახევარს მოხმარება არ დაუდგინდა.

30 ივლისს საკონსტიტუციო სასამართლომ პარტია „გირჩის“ წევრების სარჩელი დააკმაყოფილა, რითაც კანაფის მოხმარებისთვის ადმინისტრაციული სასჯელი გააუქმა.საკონსტიტუციო სასამართლომ კანაფის მოხმარებაზე სისხლის სამართლის პასუხისმგებლობა 2017 წლის 30 ნოემბერს გააუქმა.