ირაკლი კობახიძემ საერთაშორისო გამჭვირვალობის ბერლინის სამდივნოს კრიტიკას უპასუხა

პარლამენტის თავმჯდომარე ირაკლი კობახიძემ „იმედის“ გადაცემაში „პირისპირ“ არასამთავრობო ორგანიზაციების მიმართ მის მიერ ბოლო დროს გაკეთებული მკვეთრი განცხადებების მიზეზები განმარტა. მისი თქმით მის ამ განცხადებებს წინ ნიკა გვარამიას მიერ ზურაბიშვილის მიმართ გამონათქვამები უსწრებდა.

„ნიკა გვარამიას გამონათქვამი არ იყო უბრალოდ მეტაფორული გამონათქვამი. ეს იყო კონკრეტული დაპირება, კონკრეტული მუქარა იმ ადამიანების მიმართ, რომლებიც მხარს უჭერენ ქალბატონ სალომე ზურაბიშვილს. შესაბამისად, როდესაც ვამბობთ, რომ ეს იყო ფაშისტური განცხადება, ამას აქვს კონკრეტული მიზეზი. შეიძლება მას სხვა ტერმინი სჯობდეს, მაგალითად ბოლშევიკური, მაგრამ ეს არის ის სულისკვეთება, რომელიც ეფუძნება ადამიანის ღირსების ტოტალურ შელახვას. როდესაც ასეთ განცხადებას არ აფასებენ არასამთავრობო ორგანიზაციები, რომლებიც თეორიულად უნდა იყვნენ ეტალონები და ტონის მიმცემები სხვებისთვის, ეს არის აბსოლუტურად შემაშფოთებელი“, - განაცხადა პარლამენტის თავმჯდომარე.
 

მას შემდეგ, რაც პარლამენტის თავმჯდომარემ არასამთავრობო სექტორის ზოგიერთი წარმომადგენელი ფაშიზმის მხარდაჭერაში დაადანაშაულა, „საერთაშორისო გამჭვირვალობა საქართველოს“ ბერლინის სამდივნომ დღეს გაავრცელა განცხადება, რომ ორგანიზაცია შეშფოთებულია პოლიტიკური კორუფციის ნიშნებით საქართველოში, ისევე, როგორც ქვეყნის თანამდებობის პირთა სიტყვიერი თავდასხმებით სამოქალაქო საზოგადოებაზე.

განცხადებაში ნათქვამია, რომ 2017 წელს კორუფციის აღქმის ინდექსში, რომელიც წელს გამოქვეყნდა, „საერთაშორისო გამჭვირვალობამ" უკვე მიუთითა ანტიკორუფციული კანონმდებლობისა და რეგულაციის აღსრულების ნაკლებობაზე.

ამასთან ორგანიზაცია მიიჩნევს, რომ მთავრობამ სრულად უნდა გამოიძიოს ბრალდებები მაღალი დონის კორუფციის შესახებ, რომელიც მედიით გავრცელებულ ფარულ აუდიოჩანაწერებში ჩანს.