ნაციონალური მოძრაობა საპრეზიდენტო არჩევნების ბათილად ცნობას ითხოვს

ნაციონალური მოძრაობის აქციაზე გამომსვლელები საპრეზიდენტო არჩევნების მეორე ტურს აკრიტიკებენ. გაერთიანებული ოპოზიციის მოთხოვნები პარლამენტის წინ მიმდინარე აქციაზე გრიგოლ ვაშაძემ გაასაჯაროვა.

"ვითხოვთ ვადამდელ საპარლამენტო არჩევნებს, ამისთვის ვითხოვთ საარჩევნო სისტემის ძირეულ ცვლილებას. ისეთ ცვლილებას, რომელიც მთლიანად შეცვლის საარჩევნო კორუმპირებულ ადმინისტრაციას, ცესკოდან დაწყებული, უბნებამდე დამთავრებული. ვიცით, რომ ეს კომისიები უნდა დაკომპლექტდეს სამოქალაქო საზოგადოების, ოპოზიციური პარტიებისა და საერთაშორისო ექსპერტების მიერ. გაერთიანებულ ოპოზიციას გიორგი ვაშაძის ინიციატივითა და ლიდერობით უკვე შემუშავებული აქვს მექანიზმი, რომელსაც ყველა პოლიტიკურ პარტიასთან შევათანხმებთ.

უნდა გაუქმდეს საოლქო კომისიები, რომელიც არაფერი არ არის, თუ არა გაყალბების კიდევ ერთი ინსტრუმენტი, საჯარო მოხელეებს მკაცრად უნდა აეკრძალოთ კამპანიაში მონაწილეობა, განსაკუთრებით მინისტრებს და მათ მოადგილეებს. ეს ხალხი ან მთლიანად წარმოადგენს ქართველ ერს ან მაშინ არიან ერთი პარტიის წარმომადგენლები და ეს თანამდებობები არ უნდა ეკავოთ.

აქედან გამომდინარე, ხელისუფლებას ვთავაზობთ – შექმენით სამუშაო ჯგუფი, დავუშვათ ხუთი ადამიანის შემადგენლობით, თუ ამდენ კვალიფიციურ პირს მონახავთ თქვენთან, ჩვენც ზუსტად ამავე რაოდენობით შევქმნით ჩვენს დელეგაციას. სამოქალაქო საზოგადოების დაკვირვების ქვეშ ცივილიზებულად, ევროპულად, კონსტიტუციურად, სამართლებრივად დავჯდეთ და ერთად გამოვიდეთ ამ პოლიტიკური კრიზისიდან. ვადას გაძლევთ 16 დეკემბრამდე. სწორედ ამ პასუხზე იქნება დამოკიდებული ჩვენი შემდეგი ნაბიჯები“, - განაცხადა გრიგოლ ვაშაძემ.

გიორგი ვაშაძემ საგანგაშო უწოდა იმას, რაც საპრეზიდენტო არჩევნებზე ხდებოდა. მან ახსენა ყალბი დოკუმენტების დაბეჭდვა და ამომრჩევლების მოსყიდვა და განაცხადა, რომ აქციაზე შეკრებილი ადამიანები ვერ შეეგუებიან უსამართლობას.

"ჩვენ ვიბრძვით იმისთვის, რომ ხელისუფლება ეკუთვნოდეს ხალხს და არა რომელიმე დაჯგუფებას. ჩვენ ვიბრძვით იმისთვის, რომ საქართველოს იყოს დემოკრატიული ქვეყანა და ჩვენ ვიბრძვით იმისათვის, რომ საქართველოში ქართველ ხალხს ეკუთვნოდეს ხმა და ეს ვერც ერთმა ხელისუფლებამ ვერ წაართვას მას.

ხშირად საუბრობენ დესტრუქციაზე. დესტრუქციას არ აწყობს ოპოზიცია, დესტრუქციას აწყობს ხელისუფლება, რომელიც არ უსმენს ხალხს და არასდროს მათ პასუხს არ სცემს თავისი მოქმედებებით. აი ამიტომ ვართ აქ,“-განაცხადა გიორგი ვაშაძემ.

რუსთაველის გამზირზე მიმდინარე აქციაზე მიხეილ სააკაშვილი skype-ით ჩაერთო. მან ოპოზიციის მხარდამჭერებს სიტყვით მიმართა.

„აღარაფერს აღარ მოვითმენთ და აღარაფერს აღარ გადავყლაპავთ. მათ ეგონათ, რომ ხალხი აღარ იბრძოლებს და დღეს ჩვენ მათ დავანახებთ რომ ჩვენ ვიბრძოლებთ მშვიდობიანად, დამაჯერებლად, ღიმილით, თავაწეული მაგრამ არასდროს ჩამოვუშვებთ ხელებს. არასდროს შევურიგდებით უსამართლობას. ჩვენ ყველაფერი გამოგვივა. ჩვენი ბრძოლა აუცილებლად დამთავრდება სრული გამარჯვებით.

იმ წამს, როგორც კი თქვენ დაგჭირდებით და დამიძახებთ, იმ წამსვე ფიზიკურად გავჩნდები თქვენ გვერდით, გავჩნდები ლიდერების გვერდით, გავჩნდები ჩვენი ახალგაზრდობის გვერდით. იმიტომ, რომ ჩვენ ყველამ ერთად უნდა დავდოთ თითო აგური ჩვენს გამარჯვებაში. იმიტომ, რომ მე მირჩევნია მოვკვდე, ვიდრე დავნებდე ამ უსამართლობას,“- განაცხადა მიხეილ სააკაშვილმა. 

მოსახლეობას სიტყვით ნაციონალური მოძრაობის პოლიტიკური საბჭოს თავმჯდომარემაც მიმართა. 

"ჩვენ გვაქვს ორი არჩევანი, ან შევეგუოთ იმას, რაც ჩაიდინა ხელისუფლებამ, ან ვიბრძოლოთ გამარჯვებამდე. ხელისუფლებამ დანიშნა მესამე ტური და მას ეგონა, რომ ჩვენ ენერგიისგან დავიცლებოდით და მონაწილეობას არ და ვერ მივიღებდით მესამე ტურში. ჩვენ, არა თუ ვიღებთ მონაწილეობას მესამე ტურში, არამედ აუცილებლად გავიმარჯვებთ, იცით რატომ ხოლხნო? ის რაც მათ იკადრეს, ყველა არჩევნები, რაც კი დამოუკიდებელი საქართველოს და ქვეყნის პირობებში ჩატარებულა, ერთად რომ შევაჯამოთ და ხარვეზები და დანაშაულებები რომ ავიღოთ, ათჯერ მეტი გააკეთეს ერთ არჩევნებში ხალხო.

ეს არ არის ნებაყოფლობით არჩეული პრეზიდეტნი ხალხნო. ამ ყველაფერს თან აკეთებდნენ კრიმინალების მეშვეობით. სინამდვილეში, არც კრიმინალები არიან და არც ძველი ბიჭები, ესენი არიან სუსთან და პოლიციასთან შეკრულები. პოლიციის უფროსი და თვითონ ძველი ბიჭი, პოლიციის უფროსი და თვითონ კრიმინალი, ერთად ატარებდა არჩევნებს. ჩვენ გვაქვს გამოსავალი. ან მივდივართ სახლებში და ფარ-ხმალს ვყრით, ან ვიბრძვით ბოლომდე,“ - განაცხადა ნიკა მელიამ.

მურმან დუმბაძის მოთხოვნა გაცილებით პრაგმატული აღმოჩნდა. მან აქციის მონაწილეებს ხვალ შუშის სასახლესთან შეკრებისკენ მოუწოდა იმისათვის რომ „ქართული ოცნების“ თავმჯდომარეს, ბიძინა ივანიშვილს ვალების გასტუმრება მოსთხოვონ.

რუსთაველის გამზირზე ნაციონალური მოძრაობის აქციაა.

საპრეზიდენტო არჩევნების მეორე ტურის საბოლოო შედეგები შეგიძლიათ იხილოთ ამ ბმულზე.