როგორ შეიძლება ბაგრატიონებს შორის სასამართლო დავის მოგვარება

საქართველოში ერების წარმოშობისა და მიგრაციის შესახებ გენეტიკურ კვლევას, ასევე ქართულ ისტორიულ გვარებს, მათ შორის ბაგრატიონების გვარს, ეთნოგენეტიკური ცენტრი ატარებს. ამის შესახებ ცენტრის სამეცნიერო მიმართულების ხელმძღვანელმა გიორგი ანდრიაძემ გადაცემა "იმედი LIVE"-ის ეთერში თქვა.

გიორგი ანდრიაძის განმარტებით, ქართული დიდ გვარები სხვადასხვა გენეტიკური შტოსგან შედგებიან და ისინი ერთნი არ არიან, მაგალითად კაპანაძე, ჯაფარიძე, გელაშვილი და ა.შ. არა ერთი წინაპრის, არამედ შედგენილი გვარები არიან.

"ბაგრატიონების შემთხვევაშიც სხვადასხვა შტოა, მაგრამ ჩვენ გვარები როგორც ასეთი არ შეგვისწავლია, რადგან ამას კომპლექსური კვლევა სჭირდება, მათ შორის ნამარხთან შედარება. ანუ შედარებული უნდა იყოს ნამარხ ძვლებთან. ჩვენ ასეთი გვაქვს თეიმურაზ მეფის ნეშტი ასტრახანში, არსებობს ბაგრატიონების საძვალე თურქეთის ტერიტორიაზე. რა თქმა უნდა, სვეტიცხოველშიც არის, მაგრამ გასაგებია, რომ ჩვენ სვეტიცხოვლის ფილაქანს ვერ ავყრით", - თქვა გიორგი ანდრიაძემ.

მისი მოსაზრებით, ბაგრატიონებში დღეს არსებული დავა არ უნდა დაუკავშირდეს მხოლოდ დნმ-ის თემას, მით უფრო მაშინ, როდესაც დღეს უკვე არსებობს საერთო შვილი (უფლისწული გიორგი ბაგრატიონი). ანდრიაძის მოსაზრებით ანა ბაგრატიონი რეგენტად უნდა ჩაითვალოს და საკითხი სხვა რაკურსში უნდა გადავიდეს:

"ბაგრატიონები არ ეკუთვნით მარტო თავიანთ თავს. ეს არის საქართველოს ისტორიის და ღირსების საქმე. ეს საქართველოს სამარკო ნიშანია. ვფიქრობ, რომ სახელმწიფო ამ საქმეში აუცილებლად უნდა ჩაერიოს, არ შეიძლება რომ სამეფო ოჯახის სახელით ვინმე ამ ჯილდოს არიგებდეს", - განაცხადა გიორგი ანდრიაძემ.

მისი მოსაზრებით, სახელმწიფოს მარტივად შეუძლია დაადგინოს ისედაც არსებული რეალობა:

"კერძოდ ის, რომ გიორგი მეფის და ერეკლეს შთამომავალი, რა თქმა უნდა, არ არის ბაგრატიონთა შტო. ესენი სათავადო გვარი არიან, რომელსაც დავითი წარმოადგენს. ზუსტად ასეთივე ბაგრატიონები ძალიან ბევრნი არიან, მათ შორის დავითაშვილები. შესაბამისად, მარტივი რეალობაა რომ ნუგზარ ბაგრატიონი და მისი ქალიშვილი ანა ბაგრატიონი პირდაპირი ხაზია და საბედნიეროდ ეს ქორწინება მოხდა, სამწუხაროდ დაიშალა", - თქვა გიორგი ანდრიაძემ.

ანდრიაძემ თქვა, რომ სახელმწიფოს შეუძლია ბაგრატიონების გარკვეული ჯგუფი ცნოს სამეფო ოჯახად, რომლის ხელმძღვანელადაც შეიძლება ვაღიაროთ გიორგი ბაგრატიონი, რომელსაც გაზრდის ანა ბაგრატიონი და ეს დავა ამ კუთხით დასრულდეს.

"არ შეიძლება საერთაშორისო ასპარეზზე საქართველოს სამეფო ოჯახის სახელით ფურცლები რიგდებოდეს, მით უმეტეს დაარიგოს დავით მუხრან ბატონმა", - თქვა გიორგი ანდრიაძემ.

ნუგზარ და ანა ბაგრატიონ-გრუზინსკები დავით ბაგრატიონ მუხრანელს სასამართლოში უჩივიან. სამოქალაქო დავა თბილისის საქალაქო სასამართლოში სამეფო სახლის სახელით უნებართვოდ სარგებლობის აღკვეთაზე მიმდინარეობს. 

ბრალდებებს კატეგორიულად უარყოფს დავით ბაგრატიონის ადვოკატი. დავის სირთულიდან გამომდინარე, თბილისის საქალაქო სასამართლო მას სამი მოსამართლის შემადგენლობით კოლეგიურად განიხილავს. სხდომაზე დაგეგმილია სპეციალისტების სტატუსით მიწვეული აკადემიკოსების - როინ მეტრეველისა და გიორგი ოთხმეზურის გამოკითხვა. 

ცნობისთვის, ანა ბაგრატიონ გრუზინსკისა და დავით ბაგრატიონ მუხრანელის სამეფო ქორწილი, პატრიარქის ინიციატივით, 2009 წელს სამებაში გაიმართა.