არქიმანდრიტი იოვანე მჭედლიშვილი: ჰიგიენის წესებს ყველა ვიცავთ და ყველას ვთხოვთ, რომ ექიმებს დაუჯერონ

არქიმანდრიტმა იოვანე მჭედლიშვილმა ჰიგიენის წესების დაცვის მნიშვნელობაზე ისაუბრა. მან ყველას სთხოვა, რომ ექიმებს დაუჯერონ.

„დიდი მარხვის წინა დღეს ეკლესია შენდობის დღეს აღნიშნავს. მისმა უწმინდესობამ სამების საკათედრო ტაძარში შეასრულა შენდობის წესი. ითხოვა შენდობა და პატიება. ხვალინდელ დღეს, 18:00 საათზე, უკვე შესრულდება სამების საკათედრო ტაძარში კრიტელის კანონი.

ასევე, სამშაბათს სამების საკათედრო ტაძარში შესრულდება ეს წესი. ხოლო ოთხშაბათს და ხუთშაბათს სიონში შესრულდება კრიტელის კანონი.

დღეს მისი უწმინდესობის ლოცვა კურთხევით სამღვდელოებამ წყალი ასხურა ტაძრის ირგვლივ და მრევლს. საუკუნეების წინ წესი იყო ასეთი, როდესაც დიდი მარხვა დგებოდა წინა დღეს ბერები ერთმანეთს შენდობას და პატიებას სთხოვდნენ და შემდგომ უკვე უდაბნოში მიდიოდნენ, რომ მარხვა დაეცვათ და ამ წესიდან გამომდინარე დღევანდელ დღემდე უკვე საუკუნეებია, ეს ტრადიცია გრძელდება.

მისმა უწმინდესობამ ქადაგების დროს მადლობა გადაუხადა ყველა იმ ექიმს, ვინც ძალას არ იშურებს ადამიანების დასახმარებლად და ჩვენც, სამღვდელოება წესს ვემორჩილებით, რასაც გვთხოვენ, ჰიგიენის წესებს ყველა ვიცავთ და ყველას ვთხოვთ, რომ ექიმებს დაუჯერონ.

ატყდა აჟიოტაჟი ზიარებასთან დაკავშირებით. არანაირი საშიშროება არ არსებობს. საშიშროება კი არა დიდი მადლია ყველა ადამიანისთვის ზიარება და ნურასდროს შეეშინდებათ, ღმერთი ჩვენთან არის. ეს არის უფლის სისხლი და ხორცი და თავისთავად საკურნებელია სულისა და ხორცისა და არა რაღაც ეპიდემიების გადამდები“, - განუცხადა „ქრონიკას“ არქიმანდრიტმა იოვანე მჭედლიშვილმა.

ბოლო მონაცემებით, ინფექციური საავადმყოფოს ბოქსირებულ განყოფილებაში სულ 19 პაციენტია მოთავსებული. ამის შესახებ ბოქსირებული განყოფილების ხელმძღვანელმა მარინა ენდელაძემ განაცხადა.

„დღეს ორ ეტაპად აიღეს 14 პაციენტზე სისხლი. მათგან ყველას უარყოფითი აქვს, ანუ კორონავირუსი არ აღმოჩნდა. ამჟამად არის 19 პაციენტი. ისევ ველოდებით 8 პაციენტის პასუხს. ყველას მდგომარეობა დამაკმაყოფილებელია“, - განაცხადა ენდელაძემ.

ასევე ცნობილია, რომ კლინიკაში მხოლოდ საქართველოს მოქალაქეები რჩებიან. მათი ნაწილი ირანიდანაა ჩამოსული, ნაწილი კი იტალიიდან.

საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე კი 29 თებერვალს დადასტურდა.

ჩინეთში გარდაცვლილთა რაოდენობამ 2 870-ს მიაღწია, ინფიცირებულთა რიცხვი კი 79 824-ს შეადგენს. მსოფლიო მასშტაბით, ვირუსი უკვე 64 ქვეყანაშია გავრცელებული, სადაც გარდაცვლილთა რაოდენობამ 109 შეადგინა. 86 993 ინფიცირებულიდან გამოჯანმრთელებული კი 42 334-ია.

26 თებერვალს ჯანმომ განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.