საქართველოში წმინდა ცეცხლს 23:15 საათზე ჩამოიტანენ

წმინდა ცეცხლს აეროპორტიდან ყოვლადწმინდა სამების საკათედრო ტაძარში მიიტანენ, სადაც სრულიად საქართველოს კათოლიკოს-პატრიარქი ილია მეორე სააღდგომო ლიტურგიას აღავლენს.

კორონავირუსის პანდემიის გამო მაცხოვრის საფლავზე ცეცხლის გარდამოსვლის რიტუალს აღმოსავლეთის სხვადასხვა მართლმადიდებლური ეკლესიის 10-15 წარმომადგენელი ესწრებოდა.

წმინდა ცეცხლი თელავივის აეროპორტში საქართველოს ელჩმა ისრაელში ლაშა ჟვანიამ მიიტანა და ქართველ სასულიერო პირებს გადასცა.

„ჩვენ თუ ფუნქცია შევიშვენეთ, მაშინ იმ ვირებს დავემსგავსებით, რომელზეც მაცხოვარი იჯდა, როდესაც იერუსალიმში დიდებით შევიდა. ჩვენ არავინ და არაფერი არ ვართ. არის მაცხოვარი, რომელმაც ჩვენთვის თავი დადო, თავისი სიცოცხლე და სიკვდილით სიკვდილი დაამარცხა. ჩვენ ეს გვახარებს, გვწამს, გვჯერა, ამ იმედით ვცოცხლობთ და ვსულდგმულობთ.

ბოლო წლებისთვის უჩვეულო იყო იერუსალიმი. თუ დავუბრუნდებით იმ პერიოდს, რომელსაც სახარება აღწერს მაცხოვრის ჯვარცმის და საფლავში დაფლვის, იმ პერიოდში აბსოლუტური სიცარიელე იყო მაცხოვრის საფლავის გარშემო. არავინ ყიჟინას არ სცემდა და არავინ ელოდებოდა აღდგომას. მოციქულებიც კი, როგორც წმინდა ნიკოდიმუსის ცხოვრებაში წერია, დაბნეულები იყვნენ სიკვდილის შიშის გამო და დამალულები იყვნენ. მხოლოდ მენელსაცხებლე დედები მივიდნენ კვირა დღეს და ცარიელი დახვდათ საფლავი, სადაც ანგელოსმა აუწყათ, რომ ის ვისაც ეძებთ მკვდართა შორის არ არის. არამედ აღდგაო. წლევანდელი წელი ჩემთვის განსახიერება იყო იმ პერიოდის რასაც სახარება აღწერს“, - განაცხდა „ქრონიკასთან“ ლაშა ჟვანიამ.

თელავივიდან სპეცრეისთ სამშობლოში საქართველოს 152 მოქალაქე დაბრუნდება. „ ერთი კვირის წინ 580 ადამიანი დარეგისტრირდა, 27 უკვე გამოემგზავრა. ჩვენ ვმუშაობთ საკოორდინაციო საბჭოსთან და იმედი გვაქვს დანარჩენი მოქალაქეებიც მალე დაბრუნდებიან სამშობლოში“, - განაცხადა ლაშა ჟვანიამ.

მართლმადიდებელი სამყარო დღეს იერუსალიმში, მაცხოვრის საფლავზე, ცეცხლის გადმოსვლის მოწმე კიდევ ერთხელ გახდა.