მეუფე დანიელი: ლიბერალური დემოკრატია არ უშლის ხელს ქრისტიანობას, მაგრამ ფსევდოლიბერალიზმი ანტირელიგიურ ფასეულობებს ქმნის

ინსტიტუციურად ლიბერალური დემოკრატია არ უშლის ხელს ქრისტიანობას, მაგრამ არსებობს ფსევდოსეკულარიზმი, ფსევდოლიბერალიზმი, რომელიც ქმნის ანტირელიგიურ და ანტიეროვნულ ფასეულობებს, - ამის შესახებ ტელეკომპანია „იმედის“ გადაცემაში „არენა“ ჭიათურისა და საჩხერის მიტროპოლიტმა, მეუფე დანიელმა განაცხადა.

„ქრისტიანულმა ისტორიამ კულტურას, ეკონომიკას, პოლიტიკას და ყველა სხვა სფეროს მხოლოდ სიჯანსაღე და განვითარების პერსპექტივა მოუტანა. ამიტომ ქართული სახელმწიფო იყო ძლიერი, როდესაც იგი ქრისტიანულ ფესვებზე იდგა. ქრისტიანობა დღესაც არის ისეთი სარწმუნოება, რომელიც გვაძლევს იმ სულიერ ენერგიას, რათა ყველაფერი სრულყოფილად შევასრულოთ და მიზანს მივაღწიოთ. როდესაც ადამიანში არის ღვთაებრივი ენერგია, მას აუცილებლად ექნება დიდი შედეგი. ეს შედეგები აისახა ჩვენს კულტურაში, ჩვენს თვითმყოფადობაში. მე-19 საუკუნეში ჩვენი ერი ისე დასუსტდა, რომ გაუცხოვდა თავის თავთან. ილია ამბობდა, რომ ქვეყნის გადარჩენა დამოკიდებულია იმაზე, გვეცოდინება თუ არა, ვინ ვიყავით და როგორ გაგვეგრძელებინა ჩვენი ისტორია. ამით მან ქართველ ერს ქართველობა გაახსენა. დღეს პოლიტიკური ფორმაციები იცვლება, მაგრამ ქრისტიანობას არ აქვს რომელიმე ერთი ფორმაციისადმი მიდრეკილება. ნებისმიერ ფორმაციაში შეიძლება ქრისტიანული წესით ცხოვრება. ინსტიტუციურად ლიბერალური დემოკრატია არ უშლის ხელს ქრისტიანობას, მაგრამ არსებობს ფსევდოსეკულარიზმი, ფსევდოლიბერალიზმი, რომელიც ქმნის ანტირელიგიურ და ანტიეროვნულ ფასეულობებს. უნდა გვესმოდეს, რომ ლიბერალური დემოკრატიის პირობებში სრულიად თავისუფლად შეიძლება იყოს ჩვენი სულიერი და ეროვნული ფასეულობები. ამის არაჩვეულებრივი მაგალითია ორი ცნობილი და წარმატებული ცხოვრება. ერთი არის იაპონია - მოწინავე, განვითარებული ქვეყანა, რომელიც აბსოლუტურად იცავს თავის ტრადიციებს და ამით არის ძლიერი. მეორე არის ისრაელი - სეკულარული ქვეყანა, მაგრამ არ უშლის იმას, რომ რელიგია იყოს პატივისცემაში. ეს არ უშლის განვითარებაში ხელს არც ისრაელს, არც იაპონიას და ასეთივე უნდა იყოს საქართველოც“, - განაცხადა მეუფე დანიელმა.