გარემოს დაცვის კომიტეტმა ტყის კოდექსში შესატან ცვლილებებს მესამე მოსმენით დაუჭირა მხარი

გარემოს დაცვისა და ბუნებრივი რესურსების კომიტეტმა პანდემის მიერ გამოწვეული შეფერხების შემდეგ პირველი სხდომა გამართა, რომელსაც კომიტეტის თავმჯდომარე ნინო წილოსანი უძღვებოდა და რომელზეც ქვეყნისათვის უმნიშვნელოვანესი კანონპროექტები, მათ შორის ტყის კოდექსში შესატანი ცვლილებები განიხილეს.

მთავრობის მიერ საკანონმდებლო ინიციატივის წესით წარმოდგენილი „საქართველოს ტყის კოდექსი“ III მოსმენაზე გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა გამოიტანა.

„ეს არის უმნიშვნელოვანესი კანონმდებლობა ტყის სექტორში რეფორმის დაწყების და ტყის სრულიად ახალებურად გამოყენებისა და მოვლისთვის. ყველა აცნობიერებს, თუ რამდენად მნიშვნელოვანია ეს კოდექსი საქართველოში გარემოს დაცვისთვის, ტყის რესურსის ეფექტიანად და მდგრადი განვითარების პრინციპების გამოყენებისთვის. ამ კანონმდებლობის მიღებით ნამდვილად ძალიან მნიშვნელოვანი პროცესები დაიწყება ტყის რესურსის ეფექტიანად და სათანადოდ გამოყენებისთვის“, - განაცხადა ნინო წილოსანმა კანონპროექტის განხილვის დაწყებამდე.

შემდეგ მომხსენებელმა, ნინო თანდილაშვილმა კიდევ ერთხელ გაიხსენა ამ უმნიშვნელოვანესი კოდექსის პროექტის თითქმის ერთწლიანი განხილვის ისტორია და პარლამენტის კომიტეტს მადლობა გადაუხადა აქტიური და ნაყოფიერი თანამშრომლობისათვის. მისი განცხადებით, ძალიან ბევრი შესწორება შევიდა პროექტში, მრავალი კონცეპტუალური საკითხის კორექტირება მოხდა და დღეს კოდექსი, ფაქტობრივად, იმ კონდიციამდეა მიყვანილი, რაც შეასრულებს ფუნდამენტურ და მნიშვნელოვან როლს ჩვენი ქვეყნის ტყეების სამომავლო განვითარების და ბუნების დაცვის საქმეში.

გარემოს დაცვისა და სოფლის მეურნეობის მინისტრის მოადგილემ აქვე კიდევ ერთი განმარტება გააკეთა საპატრიარქოს თემასთან დაკავშირებით და აღნიშნა, რომ კანონპროექტის განხილვის პერიოდში არაერთი მცდარი ინფორმაცია გავრცელდა, რომ მთავრობა მიზანმიმართულად აპირებს არჩევნების წინ საპატრიარქოს გადასცეს ტყეები და საკუთრების უფლება მათზე.

„პირდაპირ შემიძლია ვთქვა, რომ ამ კანონით საპატრიარქოს, თუკი მიეცემა გარკვეული რაოდენობის ტყეები ეკლესია-მონასტრების მიმდებარედ, რომელთა დიდი ნაწილი, რა თქმა უნდა, ტყის ფონდშია განთავსებული, მას უფრო მეტი ვალდებულება ექნება ამ კოდექსით და ახალი კანონმდებლობით, ვიდრე უფლება. ეს ვალდებულებები მოიცავს მოვლას, აღდგენას, ტყის მდგრად მართვას, სატყეო სპეციალისტების დაქირავებას, ინვენტარიზაციას, მართვის გეგმების შედგენას და მთელ რიგ სხვა ვალდებულებებს, ისეთს, რომლებიც სხვა დანარჩენ ტყით მოსარგებლეებს დაეკისრებათ, რომლებიც ტყის გარკვეულ ტერიტორიებს სხვადასხვა მიზნისათვის მიიღებენ სახელმწიფოსგან“, - განაცხადა ნინო თანდილაშვილმა.

მისი თქმით, ამგვარად სპეკულაციები, თითქოს, ტყის ნაწილი უსასყიდლოდ გადაეცემა საპატრიარქოს, არის მორიგი ტყუილი და შეურაცხყოფა მათი, ვინც ერთობლივად გაწია შრომა ამ კოდექსის საბოლოო კონდიციამდე მიყვანის საქმეში.

„პირიქით, საპატრიარქოს შეეზღუდა ჰექტრულად რაოდენობა ფართობებისა, რაც შეიძლება რომ მან ეკლესია-მონასტრების მიმდებარედ სახელმწიფოსგან მიიღოს და ისარგებლოს ისევ და ისევ იმ მიზნებისთვის, რომ იმ ეკლესი-მონასტრებს, რომლებიც ტყის ფონდში ისტორიულად განთავსებული გახლავს, მოუაროს, უპატრონოს და ჩვენ ეს შევუნახოთ მომავალ თაობებს. ეს არის ასახული კანონში ცალსახად. ამ კანონის მთავარი მიზანი გახლავს ის, რომ ჩვენ უკეთესად მოვუაროთ იმ მნიშვნელოვან რესურს, რაც გვაქვს - 40%-ს ჩვენი ქვეყნის ტერიტორიისა, რომელიც არის უმნიშვნელოვანესი რესურსი ეკოსისტემური თვალსაზრისითაც, და ცხადია, მას თავისი ეკონომიკური ღირებულებაც გააჩნია“, - განაცხადა მინისტრის მოადგილემ.

როგორც მან აღნიშნა, განხილვებისას გამოთქმული იყო რედაქციული ხასიათის შენიშვნები, რომლებიც ასახულია პროექტში.

კომიტეტის წევრებმა კიდევ ერთხელ ხაზგასმით აღნიშნეს კანონპროექტის მნიშვნელობა და მისი მიღების აუცილებლობა. მათი თქმით, მნიშვნელოვანია, რომ ამ კოდექსით სახელმწიფო მთლიანად იღებს პასუხისმგებლობას ტყის დაცვაზე, ხოლო რაც შეეხება საეკლესიო საკითხს, მათივე აზრით, ეს უკავშირდება ხელოვნურად შექმნილ აჟიოტაჟს. კომიტეტის წევრთა განცხადებით, ამ პროექტში დიდი შრომა ჩაიდო როგორც მთავრობის, ისე პარლამენტის, არასამთავრობო სექტორის მხრიდან და მრავალი შენიშვნა, მათ შორის მაჟორიტარების მხრიდან, ფაქტობრივად, გათვალისწინებულ იქნა.

საბოლოოდ, კომიტეტმა კანონპროექტს მესამე მოსმენით ერთხმად დაუჭირა მხარი.