საქართველოს დამოუკიდებლობის დღე პანდემიის მიუხედავად მსოფლიოს დედაქალაქებშიც აღინიშნება

საქართველოს საგარეო საქმეთა სამინისტროს და საზღვარგარეთ საქართველოს დიპლომატიური წარმომადგენლობების ჩართულობით, საქართველოს დამოუკიდებლობის დღე მსოფლიოს მასშტაბით, სხვადასხვა სახის ღონისძიებებით აღინიშნება. ინფორმაციას საგარეო საქმეთა სამინისტრო ავრცელებს.

საქართველოს დამოუკიდებლობის დღის აღსანიშნავად, ტრადიციულად, საქართველოს დროშის ფერებში განათდება მსოფლიოს სხვადასხვა ღირსშესანიშნაობები. კერძოდ, საქართველოს ეროვნული სიმბოლოს ფერებში განათდება იერუსალიმის ძველი ქალაქის იაფოს კარიბჭის შესასვლელი. იაპონიის დედაქალაქ ტოკიოს ცენტრში შენობებზე გამოისახება საქართველოს დროშის ფერები. ქალაქ თესალონიკში საქართველოს გენერალური საკონსულოს ორგანიზებით, თესალონიკის მერიის შენობა ასევე განათდება საქართველოს დროშის ფერებში.

26 მაისის აღშანიშნავად, ტრადიციულად, საქართველოს ეროვნული სიმბოლოს ფერებში განათდება ლიეტუვის ერთ-ერთი ღირსშესანიშნაობა - თეთრი ხიდი, ასევე ქალაქ კაუნასის „რატუშე“. საქართველოს დროით 17:10 საათზე ვილნიუსის მთავარ საკათედრო მოედანზე გაიშლება საქართველოს გიგანტური დროშა და შესრულდება საქართველოს სახელმწიფო ჰიმნი, ხოლო - ესტონეთსა და აზერბაიჯანში საქართველოს საელჩოების შენობებზე გამოისახება საქართველოს დროშის ფერები.

ასევე, ბელარუსში საქართველოს საელჩოს ორგანიზებით, მინსკის ცენტრში მდებარე სავაჭრო ცენტრის დიდ ეკრანზე, მოხდება 26 მაისის სიმბოლიკის ჩვენება, ირლანდიაში საქართველოს საელჩოს ორგანიზებით კი, დუბლინის ქუჩებში გამოიფინება საქართველოს დროშები.

ასევე, აღსანიშნავია, რომ ნიდერლანდების სამეფოში, ჰააგის სამრეკლოდან გაჟღერდება საქართველოს ჰიმნი. ეროვნული დღესასწაულის აღსანიშნავად სხვადასხვა სახის ღონისძიებები მოეწყობა აშშ-ში, მექსიკაში, აზერბაიჯანში, თურქეთში, უზბეკეთში, ბელარუსში, პოლონეთში, ლიეტუვაში, ირლანდიაში, სლოვენიაში, ესპანეთში, შვეიცარიასა და საფრანგეთში.

კერძოდ, აშშ-სა და მექსიკაში დამოუკიდებლობის დღისადმი მიძღვნილი ღონისძიებების ფარგლებში, გაიმართება შემეცნებითი ონალინ-კონფერენციები, აშშ-ში საქართველოს საელჩოს სოციალური ქსელების მეშვეობით გავრცელდება მასალა ქართული კულინარიის შესახებ და საელჩოს შეფმზაეულის მასტერ-კლასი.

აზერბაიჯანში, საქართველოს ელჩი, დიასპორის წარმომადგენლებთან ერთად, ქ. კახში ყვავილებით შეამკობს 9 აპრილის მემორიალს, ხოლო უზბეკეთში საქართველოს საქმეთა დროებითი რწმუნებული და საელჩოს წარმომადგენლები, ქ. ტაშკენტის ქრისტიანულ სასაფლაოზე, პატივს მიაგებენ საქართველოს დამფუძნებელი კრების თავმჯდომარის მოადგილის, ალექსანდრე ლომთათიძის საფლავს.

26 მაისს, საქართველოს დამოუკიდებლობის დღესთან დაკავშირებით, საქართველოს საგანგებო და სრულუფლებიანი ელჩი ილია დარჩიაშვილი და პოლონეთის რესპუბლიკის სეიმის ვიცე-მარშალი მალგოჟატა გოშევსკა, სიმბოლურად გვირგვინით შეამკობენ ვარშავის აჯანყების მუზეუმში, თავისუფლების პარკში, პოლონეთის არმიის ქართველ ოფიცერთა მემორიალს.

საფრანგეთში საქართველოს ელჩი და საელჩოს თანამშრომლები ყვავილებით შეამკობენ პირველი რესპუბლიკის დამფუძნებელთა საფლავებს ლევილის ქართველ მამულიშვილთა სასაფლაოზე. ასევე,დამოუკიდებლობის რისადმი მიძღვნილი ღონისძიებების ფარგლებში, საფრანგეთში საქართველოს საგანგებო და სრულუფლებიანი დესპანი, მონაწილეობას მიიღებს დამოუკიდებლობის დღისადმი მიძღვნილ ინტერაქტიულ ვიდეო კონფერენციაში ლევილიდან, თბილისის ბაქსვუდის სკოლის მოსწავლეებისთვის ბულგარეთში, საქართველოს საელჩო გამართავს დამოუკიდებლობის დღისადმი მიძღვნილ ვიდეო-კონფერენციას, რომელშიც მონაწილეობას მიიღებენ ბულგარეთის ხელისუფლების, ასევე ქართული კულტურის მოღვაწეები.

ლატვიაში საქართველოს საელჩოს ორგანიზებით გავრცელდება ვიდეო-რგოლი, სადაც ლატვიის პრემიერ-მინისტრი და დიპლომატიური კორპუსი საქართველოს დამოუკიდებლობის დღეს მიულოცავს. ვიდეო-მიმართვები გავრცელდება ასევე აზერბაიჯანში, აშშ-ში, ქ.ნიუ-იორკში, ბრაზილიაში, ბელორუსში, გერმანიაში, გაერთიანებულ სამეფოში, ესტონეთში, ვატიკანში, იაპონიაში, ირლანდიაში, ეგვიპტეში, ირანში, ისრაელში, კორეის რესპუბლიკაში, ნორვეგიაში, სლოვენიაში, უნგრეთსა და შვეიცარიის კონფედერაციაში.
ბელარუსში საქართველოს საელჩოს ძალისხმევით, ქართველი თანამედროვე/აქტუალური ხელოვნების ექსპოზიციის ნამუშევრების ონლაინ გამოფენა მოეწყობა, ესპანეთში კი ონლაინ-გამოფენა კონკუსი მცირეწლოვანთათვის.

ირლანდიაში საელჩოს სოციალური ქსელის მეშვეობით გაზიარდება საქართველოს ხელოვნების სასახლის კოლექციები. ასევე, თურქეთში, საქართველოს საელჩო, 26 მაისს, დამოუკიდებლობის დღესთან დაკავშირებით საჰაერო ბურთებს გაუშვებს ცაში, რომლებზეც გამოსახული იქნება საქართველოს დროშა. სამხრეთ აფრიკაში, კი ახალგაზრდა ქართველი შემსრულებლის მიერ საელჩოს ორგანიზებით შესრულდება საქართველოსა და სამხრეთ აფრიკის ჰიმნები.

აღსანიშნავია, რომ 26 მაისს, შვეიცარიაში საქართველოს საქმეთა დროებითი რწმუნებულისა და ქ. ბერნის მერის შეხვედრის ფარგლებში, მერიის თანამშრომლებთან ერთად აღინიშნება შვეიცარია-საქართველოს მეგობრული ურთიერთობების 102 წლის თარიღი.

დამოუკიდებლობის დღესთან დაკავშირებით, ევროპის საბჭოში საქართველოს წარმომადგენლობის სოციალური ქსელებზე გაზიარდება საქართველოს თეატრის, მუსიკის, კინოსა და ქორეოგრაფიის სახელმწიფო მუზეუმის - ხელოვნების სასახლის ვირტუალური კოლექციები და ოკუპაციის მუზეუმის ვირტუალირი ვერსია.

26 მაისი საქართველოს დამოუკიდებლობის დღეა. ზუსტად 102 წლის წინ, 1918 წლის 26 მაისს, თბილისში საქართველოს ეროვნულმა საბჭომ სახელმწიფოებრივი დამოუკიდებლობის აქტი მიიღო.