ფილიპ რიკერი: აშშ-ის და საქართველოს პარტნიორობა არასდროს ყოფილა ისეთი ძლიერი, როგორიც დღეს

აშშ-ის სახელმწიფო მდივნის თანაშემწის მოვალეობის შემსრულებელი, ფილიპ რიკერი საქართველოს დამოუკიდებლობის დღეს ულოცავს. ინფორმაციას საგარეო საქმეთა სამინისტრო ავრცელებს.

უწყების ცნობით, რიკერმა აღნიშნა, რომ საქართველოს და აშშ-ის პარტნიორობა ასეთი ძლიერი არასოდეს ყოფილა. მან ასევე საქართველოში ყოფნისას საოკუპაციო ხაზთან ვიზიტი გაიხსენა.

„ამერიკის შეერთებული შტატები ყოველთვის მხარს დაუჭერს საქართველოს სუვერენიტეტსა და საერთაშოროსო სამართლით დადგენილი საზღვრების ფარგლებში მის ტერიტორიულ მთლიანობას. ჩვენი სტრატეგიული პარტნიორობა, რომელიც დაფუძნებულია ჩვენს ერთიან ღირებულებებზე, თავისუფლებასა და დამოუკიდებლობაზე, არასდროს ყოფილა ისეთი ძლიერი, როგორიც დღეს. ქართველი და ამერიკელი სამხედროები მხარდამხარ იბრძვიან ავღანეთში. ახლა კი ჩვენ ერთად ვებრძვით კორონავირუსით გამოწვეულ პანდემიას“, - ამბობს რიკერი.

მან ხაზი გაუსვა იმასაც, რომ აშშ საქართველოს 2.7 მილიონი დოლარით დაეხმარება და სიამაყე გამოთქვა ლუგარის ლაბორატორიის როლით პანდემიასთან გამკლავების საკითხში.

„ჩვენ ვამაყობთ თბილისში რიჩარდ ლუგარის ცენტრთან ხანგრძლივი თანამშრომლობით, რომელმაც ეგზომ მნიშვნელოვანი ფუნქცია შეასრულა პანდემიასთან საქართველოს ბრძოლაში. მე სიამოვნებით ველი საქართველოსთან ჩვენი მუშაობის გაგრძელებას ჩვენს ქვეყნებს შორის ურთიერთობების გასაძლიერებლად, რაც საქართველოს მიმდინარე დემოკრატიული და საკანონმდებლო რეფორმების მხარდამჭერია, და კიდევ უფრო გააფართოებს ეკონომიკურ და ხალხთაშორის კავშირებს. გილოცავთ მთელ საქართველოს დამოუკიდებლობის დღეს!“ - წერს რიკერი.