დიმიტრი ხუნდაძე: საყოველთაო ჯანდაცვის შემოღების შემდეგ ბავშვთა სიკვდილობის მაჩვენებელი საერთო ევროპულს უახლოვდება

საყოველთაო ჯანდაცვის პროგრამის ამოქმედების შემდეგ ბავშვთა სიკვდილობა მნიშვნელოვნად შემცირდა. პიკური მაჩვენებელი ამ მხრივ იყო 2009 წელს, დღეს კი ის უახლოვდება საერთო ევროპულ მაჩვენებელს, - ამის შესახებ საგაზაფხულო სესიის პლენარულ სხდომაზე სიტყვით გამოსვლისას მცხეთის მაჟორიტარმა დეპუტატმა, ჯანდაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ განაცხადა.

„მესმის, რომ ოპოზიცია გაბრაზებულია, მათ ამის საფუძველი აქვთ, განსაკუთრებით ბოლო ორი დღეა, მაგრამ მთავარი გაბრაზება მათ ოქტომბრის არჩევნებზე ელოდება. რაც შეეხება ბავშვთა სიღარიბეს, რა თქმა უნდა, ქვეყანაში ეს პრობლემა არსებობს და ის გუშინ ან გუშინწინ არ დაწყებულა. თუმცა, როდესაც ამაზე საუბრობენ წინა ხელისუფლების წარმომადგენლები, მათ უნდა შეადარონ, რა მდგომარეობაში ჰყავდათ მათ ბავშვები. დღეს მდგომარეობა მნიშვნელოვნად განსხვავდება, თუმცა პრობლემა ისევ პრობლემად რჩება. საყოველთაო ჯანდაცვის პროგრამის ამოქმედების შემდეგ ბავშვთა სიკვდილობა მნიშვნელოვნად შემცირდა. პიკური მაჩვენებელი ამ მხრივ იყო 2009 წელს, დღეს კი ის უახლოვდება საერთო ევროპულ მაჩვენებელს. დასრულდა ის დრო, როცა ადამიანი ჯანმრთელობის პრობლემას აწყდებოდა და ვერ მიდიოდა კლინიკაში სამკურნალოდ. ხშირად ოჯახები უარს ამბობდნენ უარს ამბობდნენ ბავშვის ყოლაზე, ვინაიდან მათ ელემენტარულად მშობიარობისთვის გადასახდელი ფული არ ჰქონდათ. საყოველთაო ჯანდაცვის პროგრამის ამოქმედების შემდეგ რამდენიმე ასეულმა ათასმა ოჯახმა იყოლია ბავშვი და ამის საფასური სახელმწიფომ გადაიხადა. მნიშვნელოვანია ისიც, რომ ქვეყანაში შემცირდა აბორტების რიცხვი. პიკური მაჩვენებელი ამ მხრივაც იყო 2012 წელს, როცა თითქმის 40 ათასი რეგისტრირებული აბორტი დაფიქსირდა. დღეს აბორტების რიცხვი მნიშვნელოვნად შემცირდა და 27 ათასს შეადგენს“, - აცხადებს დიმიტრი ხუნდაძე.