ვაკის პარკის შადრევნები შესაძლოა მდინარე ვერეს აუზიდან მომარაგდეს

თბილისის მერის, კახა კალაძის განცხადებით, ვაკის პარკის სრული რეაბილიტაციის პროექტი უკვე მზადაა და პროექტის ფარგლებში, კასკადისა და შადრევნების წყლით უზრუნველყოფის სხვადასხვა ალტერნატივა იქნება შესწავლილი, მათ შორის - მდინარე ვერეს აუზიდან წყლის მიწოდების შესაძლებლობა.

„მე არაერთხელ აღვნიშნე და კიდევ ერთხელ მინდა გავიმეორო, რომ ქვეყანაში არსებული საგანგებო მდგომარეობის მიუხედავად, დედაქალაქში მიმდინარე ინფრასტრუქტურული პროექტები არ შეჩერებულა. შეიცვალა სამუშაოების განხორციელების ტემპი, თუმცა საფრთხე არცერთი მათგანის ბოლომდე მიყვანას არ შექმნია. თბილისის მერიის გარემოს დაცვის საქალაქო სამსახურმა ვაკის პარკის ტერიტორიაზე არსებული კასკადისა და შადრევნების რეაბილიატაციის საპროექტო დოკუმენტაციის შედგენაზე, შპს LMC-სთან ხელშეკრულება გააფორმა. აღნიშნული შესყიდვის ფარგლებში, დამუშავდება კასკადისა და შადრევნების, როგორც არქიტექტურული, ისე საინჟინრო პროექტები. მნიშვნელოვანია, რომ პროექტირების შედეგად, ობიექტის პირვანდელი იერსახე შენარჩუნდება. პროექტის ფარგლებში, კასკადისა და შადრევნების წყლით უზრუნველყოფის სხვადასხვა ალტერნატივა იქნება შესწავლილი, მათ შორის, მდინარე ვერეს აუზიდან წყლის მიწოდების შესაძლებლობა. ასევე, კვლევის ეტაპზე, შესწავლილი იქნება კასკადის მდგრადობაც“ - აღნიშნა კახა კალაძემ.

მისივე განცხადებით, პროექტის შემუშავებისა და განხილვის პროცესში მოსახლეობაც იყო ჩართული.

„როგორც იცით, ეს არის ევროპის ერთ-ერთი ყველაზე დიდი კასკადი. საკმაოდ რთული კონსტრუქციაა, რომელიც სამწუხაროდ, მოუვლელობის გამო, წლებია გამორთულია. პროექტის შედეგად, ცენტრალური ღერძის გასწვრივ არსებული კასკადი და შადრევნები ჩვენს დედაქალაქს პირვანდელი დაუბრუნდება. რეაბილიტაციის პროექტი ზაფხულის ბოლოსთვის იქნება მზად. გარდა ამისა, როგორც მოგეხსენებათ, გარემოს დაცვის საქალაქო სამსახურის დაკვეთით, ბრიტანულმა კომპანიამ - CBA Studios, ვაკის პარკის სრული რეაბილიტაციის პროექტი დაამუშავა, რომლის ფარგლებშიც, აქტიური კომუნიკაცია იყო ადგილობრივ მოსახლეობასთან. ჩატარდა საჯარო შეხვედრაც, რომელზეც პროექტის ავტორებმა პარკის ფუნქციურ ზონირებასთან დაკავშირებით, საკუთარი ხედვები და მოსაზრებები წარადგინეს. ამასთანავე, ადგილზე შეკრებილ მოსახლეობას მიეცა საშუალება, ვაკის პარკის პროექტთან დაკავშირებით, საკუთარი პოზიცია დაეფიქსირებინა. პოზიციების შეჯერების შედეგად, მზად გვაქვს ვაკის პარკის სრული რეაბილიტაციის პროექტი“ - აღნიშნა დედაქალაქის მერმა.

კახა კალაძის განცხადებით, დამატებითი რესურსის მოსაძიებლად, საერთასორისო ინსტიტუტებთან მიმდინარეობს მოლაპარაკებები.

„აღსანიშნავია, რომ ამგვარი ფართომასშტაბიანი რეაბილიტაცია ვაკის პარკში პირველად მოხდება. ძალიან მნიშვნელოვანია ის ფაქტი, რომ კოვიდ 19-ით გამოწვეული პრობლემების მიუხედავად, გარემოს დაცვის საქალაქო სამსახურს არ გაუჩერებია საპროექტო თუ ინფრასტრუქტურული სამუშაოები ყველა დიდი პროექტისთვის. ამჟამად, აქტიურად მიმდინარეობს კომუნიკაცია სხვადასხვა საერთაშორისო საფინანსო ინსტიტუტთან დამატებითი რესურსის მოძიების მიზნით. ისინი მზად არიან, გამოყონ დაფინანსება იმისთვის, რომ უმოკლეს ვადაში დაიწყოს, როგორც ვაკის პარკის რეაბილიტაცია, ასევე, თემქის ხევში და დიღმის ჭალებში ახალი საქალაქო პარკების მოწყობის სამუშაოები“ - განაცხადა კახა კალაძემ დედაქალაქის მთავრობის სხდომაზე.