2020 წლის კონკურსი „სუფთა რეგიონი“ იწყება

გარემოს დაცვის საერთაშორისო დღეს 2020 წლის კონკურსი „სუფთა რეგიონი“ გამოცხადდა. კონკურსი საქართველოს მწვანეთა მოძრაობა/დედამიწის მეგობრები-საქართველოს ინიციატივითა და გარემოს დაცვისა და სოფლის მეურნეობის სამინისტროს მხარდაჭერით, პროექტის „დავიცვათ საქართველოს სისუფთავე“ ფარგლებში უკვე მეხუთედ ტარდება.

კონკურსის მიზანია, მთელი ქვეყნის მასშტაბით ყველაზე „სუფთა რეგიონი“, „სუფთა მუნიციპალიტეტი“, „სუფთა ქალაქი/დაბა“, „სუფთა სოფელი/თემი“, „სუფთა/ლამაზი ქუჩა“, „სუფთა/ლამაზი ეზო“, „სუფთა ლამაზი საწარმოს/დაწესებულების ეზო“ და „ლამაზი აივანი“ გამოავლინოს.

„ყველას ვულოცავ გარემოს დაცვის საერთაშორისო დღეს. გარემოს დაცვასა და გარემოზე ზრუნვაში ქვეყნის თითოეულმა მოქალაქემ უნდა მივიღოთ მონაწილეობა. დღეს გამოცხადდა მნიშვნელოვანი კონკურსი „სუფთა რეგიონი“, რომელიც ერთგვარ ტრადიციად იქცა. სულ უფრო მეტი ადამიანი ერთვება ამ კონკურსში, რაც ძალიან მნიშვნელოვანია. ვისურვებდი, რომ ქვეყანაში ასეთი აქტივობები კიდევ უფრო ბევრი იყოს“, - განაცხადა გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა.

ორგანიზაციის „საქართველოს მწვანეთა მოძრაობა/დედამიწის მეგობრები-საქართველო“ თავმჯდომარემ, ნინო ჩხობაძემ, ღონისძიების მონაწილეებს გარემოს დაცვის საერთაშორისო დღე მიულოცა და აღნიშნა, რომ გარემოს სისუფთავე არის ერთ-ერთი მთავარი ფაქტორი, რითაც შესაძლებელია ახალი კორონავირუსის დაძლევა.

„დღეს, „დავიცვათ საქართველოს სისუფთავის“ პროექტის ფარგლებში, ცხადდება რიგით მეხუთე კონკურსი „სუფთა რეგიონი“, რომელიც 2021 წლის იანვარში შეჯამდება. ვთხოვთ ყველა მუნიციპალიტეტს და მოქალაქეს, მონაწილეობა მიიღონ კონკურსში“, - განაცხადა ნინო ჩხობაძემ.

პროექტის „დავიცვათ საქართველოს სისუფთავე“ ფარგლებში დაწესებული კონკურსი „სუფთა რეგიონი“ ქვეყნის მასშტაბით სტიქიური ნაგავსაყრელების რიცხვს ამცირებს და მნიშვნელოვან როლს ასრულებს საზოგადოების ცნობიერების ამაღლებაში.

პროექტს ახორციელებს არასამთავრობო ორგანიზაციები „დავიცვათ საქართველოს სისუფთავე“ (KGT), საქართველოს ბუნების მკვლევართა კავშირი „ორქისი“, „საქართველოს მწვანეთა მოძრაობა/დედამიწის მეგობრები - საქართველო“, საქართველოს გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრთან, მყარი ნარჩენების მართვის კომპანიასთან თანამშრომლობით და შვედეთის მთავრობის მხარდაჭერით.

2019 წლის კონკურსში ნომინაციები ასე გადანაწილდა:

„სუფთა რეგიონი“ – კახეთის რეგიონი;
„სუფთა ქალაქი“ – ზუგდიდი;
„სუფთა მუნიციპალიტეტი“ – ზუგდიდის მუნიციპალიტეტი;
„სუფთა სოფელი“ – ორსანტია (ზუგდიდის მუნიციპალიტეტი);
„ლამაზი აივანი“ – მცხეთა ლილი კაპანაძე სახლის აივანი;
„სუფთა ქუჩა“ თბილისი - ს. ზაქარიაძის ქუჩა;
„საწარმოს ლამაზი ეზო“ – თელავი, ღვინის კომპანია „შუმის“ ეზო;
„ლამაზი ეზო” – გურჯაანი იზა გაბიტაშვილის ეზო.