დედაქალაქში ჰაერის ხარისხი ბოლო სამ თვეში გაუმჯობესდა

„მიმდინარე წლის მარტში, აპრილსა და მაისში დედაქალაქში ჰაერის ხარისხი გაუმჯობესდა - პანდემიასთან დაკავშირებული შეზღუდვების შედეგად გარემოზე ნეგატიური ზეწოლა მნიშვნელოვნად შემცირდა“, - ამის შესახებ გარემოს ეროვნული სააგენტოს გარემოს დაბინძურების მონიტორინგის დეპარტამენტის უფროსმა მარინა არაბიძემ პრესკონფერენციაზე განაცხადა.

მისი თქმით, ტრანსპორტის რაოდენობის შემცირებამ მკვეთრად გააუმჯობესა მდგომარეობა აზოტის დიოქსიდის კუთხით.

„2019 წელს, 1 წლის აზოტის დიოქსიდის საშუალო წლიური კონცენტრაცია წერეთლის გამზირზე შეადგენდა 59 მიკროგრამ მეტრკუბს, მაისში 60 მიკროგრამ მეტრკუბს და ეს ნორმას აღემატებოდა 1,5-ჯერ.

2020 წლის მარტში კი, ამავე სადგურზე იყო 30 მიკროგრამ მეტრკუბი. ეს ნორმის ფარგლებშია, რადგან ნორმაა 40 მიკროგრამ მეტრკუბი და შარშანდელთან შედარებით განახევრებულია. ეს კლება გაგრძელდა აპრილშიც და იყო 26 მიკროგრამ მეტრკუბი, ხოლო მაისის თვეში 23 მიკროგრამ მეტრკუბზე ჩამოვიდა ეს მონაცემი.

ტრანსპორტის რაოდენობის შემცირებამ მკვეთრად გააუმჯობესა მდგომარეობა აზოტის დიოქსიდის კუთხით. ჩვენ სულ ვმსჯელობდით, რომ მთავარი დამაბინძურებელი დედაქალაქში იყო ტრანსპორტი და ამ მონაცემებმა დაადასტურა ეს მსჯელობა. მიმდინარე თვეებში ჰაერის კარგი ხარისხი ფიქსირდებოდა. ჯერჯერობით ჰაერის ცუდი ხარისხი არ დაფიქსირებულა, რაც შეზღუდვები მოიხსნა“, - აღნიშნა მარინა არაბიძემ.