სოზარ სუბარი: სახალხო დამცველის მიუკერძოებელი დასკვნა ძალიან კარგი და მნიშვნელოვანი იქნება

ომბუდსმენის ფუნქცია არაა მიმდინარე სისხლის სამართლის საქმის გამოძიებაში ჩართვა. თუმცა, როდესაც მხარე მას ამ თხოვნით მიმართავს და პროკურატურაც არაა წინააღმდეგი, სახალხო დამცველის მიუკერძოებელი დასკვნა ძალიან კარგი და მნიშვნელოვანი იქნება, - ამის შესახებ ტელეკომპანია „იმედის“ გადაცემაში „არენა“ პრემიერ-მინისტრის მრჩეველმა, სოზარ სუბარმა განაცხადა.

„მე არ ვიცნობ სისხლის სამართლის საქმის მასალებს, რათა ვისაუბრო იმაზე, არსებობს თუ არა კითხვები გამოძიებასთან. დღეს მოხდა ძალიან კარგი ფაქტი, როდესაც ოჯახმა მიმართა სახალხო დამცველს. რამდენადაც ვიცი, პროკურატურამაც გამოთქვა მზადყოფნა თანამშრომლობისთვის. ზოგადად ეს არ არის სახალხო დამცველის მანდატი, მას შეუძლია პარალელური გამოძიების ჩატარება, ისევე როგორც მედიას - ჟურნალისტური გამოძიების, მაგრამ ომბუდსმენის ფუნქცია არაა მიმდინარე სისხლის სამართლის საქმის გამოძიებაში ჩართვა. თუმცა, როდესაც მხარე მას ამ თხოვნით მიმართავს და პროკურატურაც არაა წინააღმდეგი, სახალხო დამცველის მიუკერძოებელი დასკვნა ძალიან კარგი და მნიშვნელოვანი იქნება. როდესაც მოკლულის ოჯახი ითხოვს ბულინგისგან დაცვას, ასეთი რამ მსოფლიოში ძალიან იშვიათად ხდება. ეს ძალიან კარგად მეტყველებს იმაზე, რა ძალებთან გვაქვს საქმე. მათ თავის დროზე შექმნეს სისტემა, რომელიც ადამიანის წამებისკენ და მკვლელობისკენ იყო მიმართული. დარწმუნებული ვარ, რომ მასალების შესწავლის შემდეგ სახალხო დამცველი საზოგადოებას თავის კომპეტენტურ აზრს ეტყვის“, - განაცხადა სუბარმა.

ნინო ლომჯარია გიორგი შაქარაშვილის საქმის გამოძიებას მონიტორინგს გაუწევს. სახალხო დამცველს პროკურატურა საქმის მასალების გაცნობის მოთხოვნაზე დათანხმდა.