კოვიდინფიცირებული აბიტურიენტისთვის საგამოცდო ცენტრი იმ სამედიცინო დაწესებულებაში მოეწყო, სადაც ის მკურნალობს

კოვიდინფიცირებული აბიტურიენტისთვის საგამოცდო ცენტრი იმ სამედიცინო დაწესებულებაში მოეწყო, სადაც ის მკურნალობს, - ამის შესახებ შეფასებისა და გამოცდების ეროვნული ცენტრის ხელმძღვანელმა, სოფო გორგოძემ ჟურნალისტებს განუცხადა.

„დღეს უცხოურ ენებში გამოცდა დაიწყო, რომელშიც კოვიდინფიცირებული აბიტურიენტი მონაწილეობას მიიღებს. შესაბამისად, ბოქსირებული პალატა აღჭურვილი იქნება იმგვარად და ყველა პროცედურა წარიმართება ისე, როგორც ეს ხდება საგამოცდო სექტორში. ამისთვის ყველა ზომა მიღებულია. განხორციელდება ჩვეულებრივად ვიდეოთვალთვალი, როგორც ეს ხდება საგამოცდო სექტორში, მას ასევე მოემსახურება 2 მეთვალყურე, რომელიც სპეციალურად იქნება ეკიპირებული. ტესტი დაიწყება იმავე დროს და წერს იმავე ტესტს, რომლესაც ყველა დანარჩენი აბიტურიენტი დღეს მეორე სესიაზე“, - განაცხადა სოფო გორგოძემ.

კოვიდინფიცირებული აბიტურიენტისთვის დარჩენილი გამოცდის ჩაბარების შესაძლებლობის შესახებ გადაწყვეტილება საქართველოს განათლების, მეცნიერების, კულტურისა და სპორტის სამინისტროს შესაბამის უწყებებთან კოორდინაციით, ექიმების რეკომენდაციების საფუძველზე და პაციენტის ჯანმრთელობის მდგომარეობის გათვალისწინებით იქნა მიღებული.

აბიტურიენტს კორონავირუსი ქართული ენისა და ლიტერატურის გამოცდის ჩაბარების შემდეგ დაუდასტურდა. ინფიცირებულის ყველა კონტაქტის იდენტიფიცირება მყისიერად მოხდა. მასთან ერთად საგამოცდო ოთახში მყოფი ცხრავე აბიტურიენტი საკარანტინო სივრცეში განთავსდა. მათ ყოველი გამოცდის წინ უტარდებით PCR ტესტი და საგნებს აბარებენ სპეციალურად გამოყოფილ საგამოცდო სივრცეში.

ერთიანი ეროვნული გამოცდები 6 ივლისს დაიწყო და 25 ივლისს დასრულდება. საგრანტო კონკურსი 25 ივლისს გაიმართება, ხოლო სამაგისტრო გამოცდები 1-ლი აგვისტოდან 4 აგვისტოს ჩათვლით ჩატარდება.

ერთიანი ეროვნულ გამოცდებისთვის საქართველოს მასშტაბით 24 საგამოცდო ცენტრია გახსნილი. COVID-19-ის შემდეგ გავრცელების შემდეგ ეს პირველი მასშტაბური შეკრებაა.