თამარ გაბუნია: 40 მილიონამდე ლარს, რომელიც მთავრობამ ინფექციურ საავადმყოფოს გამოუყო, ცენტრი თავად განკარგავს

მიუხედავად იმისა, რომ ინფექციური დაავადებების, კლინიკური იმუნოლოგიისა და შიდსის ცენტრი კრიტიკულად მნიშვნელოვან როლს ასრულებს ჩვენს ქვეყანაში, სამწუხაროდ, ამორტიზებულ შენობაში იმყოფებოდა და წლების განმავლობაში ეს პრობლემა იყო გადაუჭრელი, - ამის შესახებ ჯანდაცვის მინისტრის მოადგილემ, თამარ გაბუნიამ ჟურნალისტებს განუცხადა.

მისი თქმით, საქართველოს მთავრობის მიერ ინფექციური საავადმყოფოსთვის 40 მილიონი ლარის გადაცემის შესახებ, მნიშვნელოვანი გადაწყვეტილება გაჟღერდა.

„დღეს ძალიან მნიშვნელოვანი გადაწყვეტილება გაჟღერდა საქართველოს მთავრობის მიერ, რომლის თანახმადაც ცენტრს ინფრასტრუქტურის გაუმჯობესებისთვის 40 მილიონ ლარამდე რესურსი გამოეყოფა და მის განკარგვას ცენტრი თავად შეძლებს. მთავარი მიზანია, რომ მის წინაშე მრავალი წლის განმავლობაში დაგროვილი პრობლემები ერთხელ და სამუდამოდ აღმოიფხვრას და ცენტრში ხარისხიანი მომსახურების მიწოდებისთვის შესაფერისი გარემო შეიქმნას. ინფექციური საავადმყოფო მიიღებს თანხას, რომ შენობა შეარჩიოს. მათ უნდა მიიღონ გადაწყვეტილება იმის შესახებ, შენობას შეიძენენ თუ უპირატესობას ახლის აშენებას მიანიჭებენ. რა თქმა უნდა, ახალი სივრცის აშენება დროში მეტად გახანგრძლივდება. დარწმუნებული ვარ, რომ აქამდეც ექნებათ გარკვეული წინასწარი მოსამზადებელი სამუშაო ამ მიმართულებით ჩატარებული. ჩვენ წინასწარ გვქონდა შეფასებული, ცენტრისთვის საჭირო ინფრასტრუქტურას რა რესურსი შეიძლება ეყოს და აქედან გამომდინარე გადაეცათ მათ თანხა, რაც შენობისთვის არის განკუთვნილი. გარდა ამისა, კოვიდ ინფექციიდან გამომდინარე, ჩვენ მსოფლიო ბანკთან და სხვა დონორებთან ვმუშაობთ, ტექნიკური აღჭურვილობის მობილიზების კუთხით. ამდენად სამინისტროს კვლავაც დარჩება გარკვეული შესაძლებლობა იმისთვის, რომ აუცილებელი აღჭურვილობა, რაც კიდევ უფრო გააძლიერებს ცენტრის შესაძლებლობებს, შეიძინოს დონორების დაფინანსების კუთხით და 40 მილიონი სუფთა სახით მოხმარდება მხოლოდ შენობას“, - განაცხადა თამარ გაბუნიამ.