თამთა მეგრელიშვილი: ბიძინა ივანიშვილი რომ ჩვენი ქვეყნის ისტორიაში უპრეცედენტო მასშტაბის ქველმოქმედია, ამაზე ვეღარავინ დავობს

ბიძინა ივანიშვილი რომ ჩვენი ქვეყნის ისტორიაში უპრეცედენტო მასშტაბის ქველმოქმედია, ამაზე ვეღარავინ დავობს. ხალხისთვის მოპარული ფულით მილიონრებად ქცეული პოლიტიკოსებისაგან განსხვავებით, მას პრაქტიკულად ყველა სფეროში ქველმოქმედებისთვის, საკუთარი ფულიდან სამ მილიარდ დოლარზე ბევრად მეტი აქვს დახარჯული, - ასე გამოეხმაურა იურისტი თამთა მეგრელიშვილი საერთაშორისო საქველმოქმედო ფონდი „ქართუს“ მიერ თბილისის მუნიციპალიტეტისთვის ყოფილი იპოდრომის ტერიტორიის საკუთრებაში უსასყიდლოდ გადაცემას.

„ქველმოქმედების შედეგის ჩამონათვალს არ გავაკეთებ, მეტისმეტად გრძელია, თუმცა მათთვის ვინც ვერ ხედავს, არ ესმის და არ უნდა საუბარი - საზეპიროდ მივიჩნევ! დღეს მის მიერ გამოსყიდული და თბილისის მუნიციპალიტეტისათვის გადაცემული იპოდრომის ტერიტორია კიდევ ერთი უპრეცედენტო საჩუქარია.
დამეთანხმებით, რომ ადგილმდებარეობის თვალსაზრისით, იპოდრომის ტერიტორია თბილისისთვის უნიკალურია, რადგანაც ის ქალაქის გული და პრაქტიკულად, თბილისის ფილტვებია. დღეს ეს ტერიტორია, როგორც დიდი საჩუქარი, ხვალ უკვე, ისევ მის მიერ დახარჯული მილიონების ფასად, თბილისის ცენტრალურ პარკად იქცევა! ივანიშვილის და მისი ოჯახის ხელწერა უცვლელია - საშვილიშვილო პროექტებით ქვეყნის საზოგადო მსახურება! ძალით პოლიტიკოსებო, ხალხის ნაძარცვი ფულით გამდიდრებულებო, გაქცეულო თუ შიშით დაბრუნებულო "პოლიტიკანებო" საარჩევნო მარათონში ხართ ჩაბმულები და იქნებ თქვენი პოლიტიკური წარსულიდან ამ მასშტაბის ვერა, მაგრამ ქვეყნისა და ხალხისთვის გაღებული მცირე ქველმოქმედებანი მაინც გაიხსენოთ... გამოგონილი ისტორიების შეთხზვა არ მიიღება“, - წერს თამთა მეგრელიშვილი.

ყოფილი იპოდრომის ტერიტორიაზე მალე ცენტრალური პარკი გაშენდება. საერთაშორისო საქველმოქმედო ფონდმა „ქართუმ“ თბილისის მუნიციპალიტეტს საკუთრებაში უსასყიდლოდ გადასცა ყოფილი იპოდრომის ტერიტორია, რომელიც კერძო მესაკუთრეებისგან გამოისყიდა.