კახა კალაძე: ჩვენს ქალაქში ტრანსპორტი იქნება ყველაზე მოწესრიგებული, ყველაზე ახალი, ყველაზე სუფთა და ყველაზე კომფორტული

„ძალიან ბედნიერი ვარ და ძალიან მიხარია, რომ რეფორმის შედეგად საზოგადოებრივი ტრანსპორტი იქნება ყველასთვის ხელმისაწვდომი, ყველაზე სწრაფი და ყველაზე კომფორტული“, - ასე წარადგინა თბილისის მერმა პრეზენტაცია, რომელიც ახალი მიკროავტობუსებისა და ავტობუსების შემოყვანას მიეძღვნა.

„ხშირად ისმის ბრალდებები იმასთან დაკავშირებით, ჯერ რატომ არ შემოიყვანეს ავტობუსები და შემდეგ რატომ არ განხორციელდა სხვადასხვა პროექტი. ამას ერთი მარტივი მიზეზი აქვს - დრო ცოტაა და არ გვაქვს დასაკარგი დღეები, თვეები. ამ რეფორმის ფარგლებში პარალელურად, ყველაფერი კეთდება. ავტობუსების განახლება-ჩანაცვლების პროექტი დაწყებულია უკვე და ძალიან მალე პარკი მთლიანად განახლდება. ის ყვითელი ავტობუსები, რომლებიც სერიოზული დისკომფორტია მგზავრებისთვის, პრობლემაა ვიზუალური თვალსაზრისით ქალაქისთვის და ასევე ეკოლოგიური კუთხით, მთლიანად ჩანაცვლდება ევროპული ტიპის ავტობუსებით.

პარალელურად მიმდინარეობს საგზაო ინფრასტრუქტურის მოწყობა/განახლება. ჩნდება საავტობუსე ზოლები, რათა საზოგადოებრივი ტრანსპორტით გადაადგილება იყოს ყველაზე სწრაფი და კომფორტული. ეს ყველაფერი კეთდება იმისთვის, რომ საზოგადოებრივი ტრანსპორტის პოპულარიზაცია მოვახდინოთ“, - განაცხადა კახა კალაძემ.

რაც შეეხება მიკროავტობუსების განახლების პროექტს, კახა კალაძის თქმით, აქაც ძალიან კრიტიკული მდგომარეობა იყო და დაწყებულია განახლების პროცესი.

„მძიმე სურათია - არსებული „ყვითელი მარშუტკები“ კრიტიკას ვერ უძლებს და ყველა რესურსი ამოწურულია. ეკოლოგიური თვალსაზრისით სერიოზულ პრობლემას ქმნის, შესაბამისად, მიმდინარეობს განახლება და ორასი ერთეული მიკროავტობუსია შემოყვანილი. პირველ ეტაპზე სამასი ერთეული მოემსახურება თბილისს და რა თქმა უნდა, ეტაპობრივად ჩანაცვლდება“, - აღნიშნა კახა კალაძემ.

მისივე თქმით, სატრანსპორტო პოლიტიკის და რეფორმის შედეგად, ქალაქში 1500-მდე მიკროავტობუსი იმოძრავებს, რადგან მეტი საჭიროება არ არის, მანამდე ეს რაოდენობა დააახლოებით 3000-ს შეადგენდა.

„ჩვენს ქალაქში ტრანსპორტი იქნება ყველაზე მოწესრიგებული, ყველაზე ახალი, ყველაზე სუფთა და ყველაზე კომფორტული“, - აღნიშნა კახა კალაძემ.

მუნიციპალური ავტოპარკის განახლების პროექტის ფარგლებში, თბილისის სატრანსპორტო კომპანიამ, ევროპის რეკონსტრუქციისა და განვითარების ბანკის (EBRD) ხელშეწყობით, 226 ერთეული 12-მეტრიანი, კომპრესირებულ ბუნებრივ აირზე (CNG) მომუშავე, EURO 6-ის სტანდარტის ავტობუსი შეისყიდა. მათი ნაწილი უკვე დედაქალაქშია, დანარჩენი კი 2021 წლის მარტამდე ეტაპობრივად შემოვა.