2021 წლის ბიუჯეტით, დედაქალაქში ჯანდაცვისა და სოციალური პროგრამების დაფინანსება 33 მილიონით გაიზარდა

დედაქალაქის 2021 წლის ბიუჯეტი 1 100 000 000-ზე მეტია და რომ არა პანდემიით გამოწვეული გარემოებები, ეს რიცხვი კიდევ უფრო შთამბეჭდავი იქნებოდა, მეტი პროექტის განხორციელებას მოვახერხებდით, თუმცა იმ მოცემულობაში, რაც დღეს ქვეყანაში და მთლიანად, მსოფლიოშია, ძალიან დიდი გავლენა იქონია შემცირებულმა ეკონომიკურმა აქტივობებმა საბიუჯეტო შემოსავლებზე. ამის მიუხედავად, 1 100 000 000 ლარი არის ის ბიუჯეტი, რომლითაც შევძლებთ აუცილებელი ხარჯების დაფინანსებას, ძირითადი ინფრასტრუქტურის გაუმჯობესებას, მოწესრიგებასა და შექმნას იმავე ტემპით, რომლითაც ამას ბოლო 3 წლის განმავლობაში ვაკეთებდით, - ამის შესახებ დედაქალაქის ვიცე-მერმა, ირაკლი ხმალაძემ, ტელეკომპანია „იმედის“ ეთერში, „დილის შოუში“, თბილისის 2021 წლის ბიუჯეტის პროექტზე საუბრისას განაცხადა.

მისივე განმარტებით, 2021 წელს არც ერთი პროექტის შეჩერება არ იგეგმება.

„როდესაც გეგმარებას ვაკეთებთ, ვიწყებთ იმით, რომ რაც უკვე დაწყებულია, ის უნდა გაგრძელდეს და მივიყვანოთ ბოლომდე, რადგან არც ერთ ისეთ პროექტს არ ვიწყებთ, რომელიც კრიტიკულად მნიშვნელოვანი არაა. შესაბამისად, გეგმარებისას, ვხელმძღვანელობთ იმ მიმართულებებით, რაც უკვე დაწყებულია და შემდეგ ვიწყებთ ახალი პროექტების გეგმარებას“ - აღნიშნა ირაკლი ხმალაძემ.

ვიცე-მერმა იმ პრიორიტეტულ მიმართულებებზე გაამახვილა ყურადღება, რომლებსაც მომდევნო წლის საბიუჯეტო თანხა მოხმარდება.

„ჯანდაცვისა და სოციალური მიმართულებით ყოველთვის დიდი ნაწილი გამოიყოფა ხოლმე ბიუჯეტიდან, 300 მილიონ ლარზე მეტი იყო, მაგრამ 2021 წლისთვის უპრეცედენტო ზღვარს მივაღწიეთ - დაახლოებით 33 მილიონით გაიზარდა ჯანდაცვისა და სოციალური პროგრამების დაფინანსება. აქ იგულისხმება დახმარებები და ჯანმრთელობის დაფინანსებები, ასევე, გავზარდეთ უფასო სასადილოების ბენეფიციარების დაფინანსება. მომლოდინეთა სიაში 3 500 ადამიანი იყო და დაფინანსების ზრდით, ყველა ადამიანი მოექცა ამ პროგრამაში. ასევე, მნიშვნელოვანია ინფრასტრუქტურული პროექტებისთვის განკუთვნილი თანხები, რაც, დაახლოებით, 360 მილიონ ლარამდეა. მომდევნო წელს ეს თანხა 50 მილიონი ლარით გაიზრდება“ - აღნიშნა ირაკლი ხმალაძემ.