კახა კალაძის განცხადებით, თვალჭრელიძის ქუჩის მიმდებარედ, მერიის ერთ-ერთ თანამშრომელს მიწა უკანონოდ ჰქონდა მიტაცებული

სამგორის რაიონში, თვალჭრელიძის ქუჩის მიმდებარედ, მერიის ერთ-ერთ თანამშრომელს მიწა უკანონოდ ჰქონდა მიტაცებული, - ამის შესახებ თბილისის მერმა, კახა კალაძემ ჟურნალისტებს განუცხადა.

მისი თქმით, ტყუილია ინფორმაცია, თითქოს, თბილისის მერიამ ადამიანები საცხოვრებელი სახლის გარეშე დატოვა.

კახა კალაძის განმარტებით, არსებობს ვიდეოკადრები და საბუთები, თუ რა ქონებას ფლობენ ეს ადამიანები.

„ერთ-ერთი თანამშრომელია, კონკრეტული ადამიანის მეუღლე, რომელმაც სახელმწიფო მიწა მიიტაცა და შენობა-ნაგებობა უკანონოდ ჰქონდა დატაცებული. რაც შეეხება ზოგადად დემონტაჟის ფაქტს, ამასთან დაკავშირებით 18 დეკემბერს დედაქალაქის მერიაში ბრიფინგი გაიმართა, სადაც ნაჩვენები იყო ფოტომასალა, ვიდეოკადრები იქ არსებული რეალური სურათის, თუ რა ხდებოდა. საუბარი იმაზე, თითქოს ხალხი საცხოვრებელი სახლებიდან გამოვიყვანეთ, ძალიან დიდი ტყუილია, როგორც ეს აფრიკის დასახლების შემთხვევასთან დაკავშირებით ხდებოდა, თითქოს, ადამიანები საცხოვრებელი სახლის გარეშე დავტოვეთ. ეს არასწორი ინფორმაცია და ძალიან დიდი ტყუილია. არსებობს ვიდეოკადრები და საბუთებიც შემიძლია მოგაწოდოთ, თუ რა ქონებებს ფლობენ ეს ადამიანები“, - განაცხადა კალაძემ.

კალაძის თქმით, სრული პასუხისმგებლობით აცხადებს, რომ ეს ადამიანები ცრუობენ, როდესაც ამბობენ, რომ საცხოვრებელი ფართი არ აქვთ.

„ეს არის მუნიციპალური მიწები და ადამიანებს არ აქვთ უფლება, მიიტაცონ და განახორციელონ უკანონო შენობა-ნაგებობების განთავსება. ჩვენ, რა თქმა უნდა, კანონის ფარგლებში ვმოქმედებთ“, - განაცხადა კალაძემ.