კახა კალაძემ აფრიკაში მცხოვრებ ოჯახს ნაჩუქარი ბინა დაათვალიერებინა და გაშლილი სუფრა დაახვედრა. ვიდეო

თბილისის მერი, კახა კალაძე ცოტა ხნის წინ, Facebook-ის პირდაპირ ეთერში, იმ ბინიდან ჩაერთო, რომელიც ალუაშვილების ოჯახს თავად აჩუქა. ვიდეოში ჩანს, როგორ შედის მრავალშვილიანი ოჯახი ახალ სახლში, მერი კი მათ ბინას ათვალიერებინებს.

ალუაშვილების ოჯახი დღეს პირველად შევიდა ბინაში, რომელიც კახა კალაძემ საჩუქრად გადასცა. ოთხოთახიანი ბინა ვარკეთილის რაიონში, ახალაშენებულ კორპუსში მდებარეობს.

ბინაში ოჯახს კვების პროდუქტები, ყველანაირი საყოფაცხოვრებო ნივთი და ტექნიკა დახვდა. დედაქალაქის მერმა ალუაშვილებს პირადად მიულოცა ახალმოსახლეობა და ბინის გასაღები გადასცა. ოჯახის წევრებმა ნაძვის ხე დღესვე კახა კალაძესთან ერთად მორთეს.

„დარწმუნებული ვარ, ბევრ ადამიანს გაუხარდება. ვიცი, რომ ბევრი გულშემატკივრობთ ამ ოჯახს. გუშინ დასრულდა ბინის კეთილმოწყობა, ავეჯის შემოტანა, დასუფთავება. კიდევ ერთხელ მინდა, ხაზი გავუსვა იმას, რაც აფრიკის დასახლებაში მოხდა. მუნიციპალური ინსპექციის მიერ უკანონო შენობების დემონტაჟის შემდეგ არცერთი ოჯახი არ დარჩენილა საცხოვრებელი სახლის გარეშე. ეს შენობა-ნაგებობები სახელმწიფოს მიტაცებულ მიწებზე აშენდა. ჩვენს მიდგომებზე ამ თემის მიმართ მეტს არ ვისაუბრებ. ახლა დღეს ყველაზე მნიშვნელოვანი არის ის, რომ აქ ვართ. მეც ძალიან მიხარია, ემოციებს ვერ ვმალავ. დარწმუნებული ვარ, მათაც გაუხარდებათ და კომფორტულად იგრძნობენ თავს ამ ახალ ბინაში“, - განაცხადა თბილისის მერმა.

„ასეთ ბინას არ ველოდით, მოლოდინს გადააჭარბა. უზომოდ გვიხარია. პირველ რიგში პატარების განათლებაზე ვიზრუნებთ და ვეცდებით ბატონი კახის იმედები გავამართლოთ. ვიცი ძალიან ბევრი ადამიანია დღეს გაჭირვებაში და ყველას მივმართავ, არ დანებდნენ, არ ჩაიქნიონ ხელი, იღბალი ერთ დღეს მათაც გაუღიმებთ,"- განაცხადა ალექსანდრე ალუაშვილმა.

კახა კალაძემ ბიზნესსექტორს სოლიდარობისკენ კიდევ ერთხელ მოუწოდა.

„მინდა, მივმართო ბიზნესსექტორს, ყველა იმ ადამიანს, ოჯახს, ვისაც აქვს შესაძლებლობა, აკეთოს სიკეთე, ძალიან მნიშვნელოვანია ერთმანეთის თანადგომა, მხარდაჭერა, სიკეთის კეთება. ეს ყველაფერი არის გადამდები. რაც უფრო მეტი ადამიანი გავერთიანდებით, მეტ ოჯახს დავეხმარებით. ამაზე მაგარი გრძნობა არ არსებობს“, - განაცხადა კახა კალაძემ.

ვარკეთილის რაიონში მდებარე ოთხოთახიანი ბინა ალუაშვილების ოჯახმა საჯარო რეესტრში 18 დეკემბერს ოფიციალურად გადაიფორმა.

15 დეკემბერს თბილისის მუნიციპალურმა ინსპექციამ აფრიკის დასახლებაში უკანონოდ აშენებული რამდენიმე შენობა-ნაგებობის დემონტაჟი განახორციელა. მერიაში განმარტავენ, რომ არც ერთი ნაგებობა არ იყო დასრულებული და რა თქმა უნდა, მასში ადამიანები არ ცხოვრობდნენ. სწორედ ამ დემონტაჟის დროს, მახლობლად მცხოვრები მამა-შვილის ფოტო გავრცელდა სოციალურ ქსელში, რომელთაც, მიუხედავად იმისა, რომ ნგრევა არ შეხებიათ, მძიმე სოციალურ პირობებში უწევთ ცხოვრება. დასახლებაში არსებული უკანონო შენობა-ნაგებობების დემონტაჟის შემდეგ, „ფეისბუქზე" ფოტომ საზოგადოების განსაკუთრებული ყურადღება მიიპყრო. გვიან ღამით თბილისის მერმა დაწერა, რომ პირადად, მისი ოჯახის სახელით, ამ ოჯახს ბინას გადასცემდა.