განათლების სამინისტრო: სტუდენტთა 1/3-ს სრულად ან ნაწილობრივ უფინანსდება სწავლის გადასახადი

პანდემიის პირობებში განათლების, მეცნიერების, კულტურისა და სპორტის სამინისტროს მიერ უმაღლესი განათლების მიმართულებით არაერთი მნიშვნელოვანი პროექტი განხორციელდა პანდემიის პირობებში, როგორც საქართველოს მთავრობის, ასევე საქართველოს განათლების, მეცნიერების, კულტურისა და სპორტის სამინისტროს მხრიდან სტუდენტებისა და მათი ოჯახების ხელშეწყობის მიზნით, უმნიშვნელოვანესი პროექტები განხორციელდა. შედეგად, სტუდენტთა 1/3 -ს სრულად ან ნაწილობრივ უფინანსდება სწავლის გადასახადი, - ამის შესახებ საქართველოს განათლების სამინისტროს მიერ გავრცელებულ განცხადებაშია აღნიშნული.

უწყება განმარტავს, რომ ამისათვის, სამინისტროს ბიუჯეტიდან ყოველწლიურად 96 მილიონი ლარია განსაზღვრული.

„მნიშვნელოვანია, რომ პანდემიის დაწყებიდან, არსებულ საგრანტო პროგრამებს დაემატა ახალი ინიციატივები. ამასთანავე, უნივერსიტეტებს მიეცათ რეკომენდაცია სტუდენტთა სწავლის საფასურის გადახდის საშეღავათო პოლიტიკასთან დაკავშირებით. შედეგად, სწავლის გადასახადი გადავადდა ან შეთავაზებულ იქნა გადახდის მოქნილი ინდივიდუალური გრაფიკი“ - აღნიშნულია განცხადებაში.

სამინისტრო განმარტავს, რომ პრემიერმინისტრის ინიციატივით, სოციალური დახმარების ფარგლებში (150 000 ქულა და ნაკლები) 2020-2021 სასწავლო წლის შემოდგომის სემესტრში სწავლის საფასური დაუფინანსდა 15 015 სტუდენტს, ხოლო2019-2020 სასწავლო წლის გაზაფხულის სემესტრის სწავლის საფასურის დავალიანება 1 588 სტუდენტს აუნაზღაურდა. გარდა ამისა, უმაღლეს საგანმანათლებლო ბაზებზე დაყრდნობით, 2020 წლის პირველი ნოემბრისა და 15 ნოემბრის მდგომარეობით უმაღლეს საგანმანათლებლო დაწესებულებებში განათლების სამინისტროს მიერ გადაირიცხა 55 589 სტუდენტის საგრანტო და პროგრამული დაფინანსება.

განათლების სამინისტროს ინფორმაციით, საქართველოს მთავრობის დადგენილებით განსაზღვრული სოციალური პროგრამის ფარგლებში, 2020-2021 სასწავლო წლისთვის დაფინანსება მოიპოვა სხვადასხვა კატეგორიის 1539-მა სტუდენტმა, მათ შორის: სტუდენტებმა, რომლებიც ბოლო 3 სასწავლო წელი სრულად სწავლობდნენ და სრული ზოგადი განათლება მიიღეს მაღალმთიანი დასახლების სკოლებში, სტუდენტებმა, რომლებიც ბოლო 2 წელი სწავლობდნენ ოკუპირებულ ტერიტორიებზე, ან 2008 წლის 7 აგვისტომდე ბოლო 1 წელი სწავლობდნენ/მუდმივად ცხოვრობდნენ ოკუპირებულ ტერიტორიებზე, სტუდენტებმა, რომლებიც ბოლო 3 სასწავლო წელი სწავლობდნენ აზერბაიჯანულენოვან და სომხურენოვან სკოლაში, ტერიტორიული მთლიანობისათვის ომში და თავისუფლებისათვის ბრძოლებში დაღუპულთა შვილებმა ან ბრძოლების შედეგად მკვეთრად გამოხატული შშმ ვეტერანებმა ან მათმა შვილებმა, მრავალშვილიანი ოჯახის (4 და მეტი შვილი) წევრებმა, უდედმამო სტუდენტებმა, შეზღუდული შესაძლებლობის მქონე პირებმა, სტუდენტებმა, რომლებიც ბოლო 3 სასწავლო წელი სრულად სწავლობდნენ და სრული ზოგადი განათლება მიიღეს გამყოფი ხაზის მიმდებარე სოფლის სკოლებში, სახელმწიფო ზრუნვის ქვეშ მყოფმა პირებმა, სტუდენტებმა, რომლებიც რეგისტრირებულნი არიან სოციალურად დაუცველთა ბაზაში, სარეიტინგო ქულით 70000 ან ნაკლები.