კახა კალაძის განცხადებით, ნინოშვილის ქუჩაზე მიწის ნაკვეთის პრივატიზება მოხდა რეკრეაციული სტატუსით და მასზე მშენებლობა არ განხორციელდება

კახა კალაძემ ნინოშვილის ქუჩაზე მდებარე ნაკვეთის პრივატიზაციასთან დაკავშირებით ისაუბრა და აღნიშნა, რომ ამ საკითხზე ბოლო დღეების განმავლობაში კონკრეტულ მედიასაშუალებებს აქვთ მცდელობა, საზოგადოება შეცდომაში შეიყვანონ. ამის შესახებ დედაქალაქის მერმა თბილისის მთავრობის სხდომაზე ისაუბრა.

მისი თქმით, ეს მიწის ნაკვეთი ეკუთვნოდა კომპანია „ცენტრ პოინტს“, რომელსაც ოდესღაც პირდაპირი წესით გადაეცა ეს ქონება მაშინდელი ხელისუფლებისგან, საცხოვრებელი კორპუსების მშენებლობის მიზნით.

„როგორც მოგეხსენებათ, „ცენტრ პოინტი“ არის ერთ-ერთი კომპანია, რომელსაც ყველაზე დიდი რაოდენობით დაზარალებული ჰყავს ( 6 ათას ოჯახზეა საუბარი) და ეს არის სერიოზული პრობლემა და მუნიციპალიტეტი დიდი ხანია მუშაობს ამ პრობლემის მოსაგვარებლად.

მიწის ნაკვეთი თბილისის მუნიციპალიტეტს კომპანიისგან გადაეცა საკუთრებაში, რათა მომხდარიყო მისი პრივატიზაცია „ცენტრ პოინტისგან“ დაზარალებულთა დაკმაყოფილების მიზნით. მინდა ხაზი გავუსვა იმ გარემოებას, რომ თბილისის მერიამ ყველაფერი გააკეთა იმისთვის, რომ პრივატიზაცია განხორციელებულიყო მიწის ნაკვეთის რეკრეაციული სტატუსით, რაც გამორიცხავს სამშენებლო სამუშაოებს. სრული პასუხისმგებლობით შემიძლია გითხრათ, რომ ამ ტერიტორიაზე არანაირი მშენებლობა და კორპუსის მშენებლობა არ მოხდება.

პრივატიზაცია განხორციელდა „სითი ლოფტზე“, რომელიც „აჭარა ჯგუფში“ შემავალი ერთ-ერთი კომპანიაა. გარდა ამისა, სიმართლეს არ შეესაბამება, რომ ერთ ლარად მოხდა პრივატიზაცია.

პრივატიზაციის პირობა არის, 18 მილიონ 400 ათასი ლარის დაფინანსების განხორციელება, „ცენტრ პოინტისგან“ დაზარალებული ოჯახების დაკმაყოფილების მიზნით.

თქვენ იცით, რომ დაზარალებულთა დაკმაყოფილების პროექტს თბილისის მერია ახორციელებს. შემიძლია გითხრათ, რომ ჩვენ ვიქნებით ის ადამიანები, ის მთავრობა, ვინც ამ პრობლემას, რომელიც უკვე რამდენიმე წელია არსებობს, მოაწესრიგებს და მოაგვარებს. როგორც ეს იყო სამშენებლო კომპანია „სვეტის“ და ასევე „ოლიმპიური ვარსკვლავის“ პირობებში.

რაც შეეხება იმ ადამიანებს, რომლებსაც დაკავებული აქვთ ამ ტერიტორიაზე განთავსებული შენობა-ნაგებობა საცხოვრებელი თუ კომერციული მიზნით, მათ მიმართ მუნიციპალიტეტი ახორციელებს შესაბამის ღონისძიებებს. კერძოდ, იმ ადამიანებს, რომლებიც შენობაში ცხოვრობენ, შევთავაზეთ ქირით გასვლა. ამ მოსახლეობის გარკვეული ნაწილი წარმოადგენს დევნილის სტატუსის მქონეს, რომლის წინაშე სახელმწიფომ ვალდებულება შეასრულა და ფართები გადასცა.

ამ ყველაფრის მიუხედავად, ვისაც საცხოვრებლის პრობლემა აქვს, მუნიციპალიტეტი ქირით დახმარების პროგრამას სთავაზობს. ღია ცის ქვეშ ჩვენ არავის დავტოვებთ.

კიდევ ერთხელ, მინდა ხაზგასმით აღვნიშნო ორი რამ: პირველი - მიწის ნაკვეთის პრივატიზება მოხდა რეკრეაციული სტატუსით და მასზე მშენებლობა არ განხორციელდება; მეორე - საპრივატიზაციო პირობაა „ცენტრ პოინტის“ დაზარალებულების დასაკმაყოფილებლად დაფინანსების - 18 მლნ 400 ათასი ლარის გამოყოფა შემძენის მიერ. კერძოდ, თბილისის მერიის ორგანიზებით, კონკრეტული სამშენებლო კომპანიები ახორციელებენ დაუსრულებელი მშენებლობების დასრულების სამუშაოებს „ცენტრ პოინტის“ დაზარალებულთა დასაკმაყოფილებლად. სწორედ ამ პროექტში უნდა გადაირიცხოს ეს თანხა. ასეთია პირობები და არა ისე, როგორც აშუქებს ზოგიერთი მედიასაშუალება მოსახლეობის შეცდომაში შეყვანის მიზნით“, - განაცხადა კახა კალაძემ.

დედაქალაქის მერის თქმით, ის სპორტსმენები კი, რომლებიც აღნიშნულ ტერიტორიაზე არსებულ შენობა-ნაგებობაში ვარჯიშობდნენ, ვარჯიშის გაგრძელებას ნორმალურ პირობებში შეძლებენ, რადგან მუნიციპალიტეტი მათაც დაეხმარება.

„ქუჩაში არასდროს არავინ დაგვიტოვებია და ეს იქნება დევნილი, უსახლკარო მოსახლე, ეს იქნება სპორტსმენი, ქუჩაში არავის დავტოვებთ. ჩვენ ჭიდაობის ფედერაციასთან გვაქს ძალიან ხშირი კომუნიკაცია, ვეხმარებით და ამ კონკრეტულ შემთხვევაშიც დავეხმარებით და ის ბავშვები, ვინც იყენებდა ამ სივრცეს და ვარჯიშობდა, ყველას შესაძლებლობა მიეცემა ნორმალურ პირობებში გააგრძელონ ვარჯიში“, - განაცხადა კახა კალაძემ.