მიტროპოლიტი დავითი ჭყონდიდში განვითარებული მოვლენებზე: იმის გადაჭრით თქმა, რომ რომელიღაც პოლიტიკური ძალა დგას ამის უკან, შეიძლება, არ იყოს მართებული

როგორც ჩანს, ძალები, რომლებსაც სურთ, რომ ეს შემთხვევა სახელდებული იყოს ეკლესიის მხრიდან არაეთიკურ მოქმედებად, ძალიან ბევრნი არიან, - ამის შესახებ ჟურნალისტებს აბბა ალავერდელმა მიტროპოლიტმა, დავითმა (მახარაძე) განუცხადა.

იგი მარტვილისა და ჭყონდიდის ეპარქიაში განვითარებული მოვლენებს გამოეხმაურა და აღნიშნა, რომ იმის თქმა, პროცესების უკან შესაძლოა გარკვეული პოლიტიკური ძალები იდგნენ, მართებული არ არის.

ამასთან მიტროპოლიტმა აღნიშნა, რომ თუ ეპარქიის ყოფილ მღვდელმთავარს პეტრე ცაავას სამღვდელო პირებთან კონტაქტი აქვს, „შეიძლება რაღაც ბიძგისა და წაქეზების მომენტები იყოს“.

„გუშინდელი შემთხვევა არაეთიკური იყო. არ შეიძლება, როდესაც კრება მიმდინარეობს სასულიერო პირების, იმ დარბაზში შეჭრა შტურმით მოხდეს. გარკვეულ ძალებს რომ რაღაც დაინტერესება აქვთ, ეს გუშინ ნათლად გამოჩნდა, რადგან ყველა საინფორმაციო საშუალება არასწორად, უმართებულოდ ადანაშაულებდა მომხდარში მეუფეს და სასულიერო პირებს. როგორც ჩანს, ძალები, რომლებსაც სურთ, რომ ეს შემთხვევა სახელდებული იყოს ეკლესიის მხრიდან არაეთიკურ მოქმედებად, ძალიან ბევრი არიან.

იმის გადაჭრით თქმა, რომ პოლიტიკური, რომელიღაც ძალა დგას ამის უკან, შეიძლება, არ იყოს მართებული, მაგრამ ის, რაც ხდება ზოგადად საქართველოში, სახელმწიფოში, მისი ანარეკლი რომ ეკლესიის შიგნითაც ხდება, ფაქტია. რაც შეეხება სასულიერო პირების და მეუფის განცხადებებს, რომელიც ნაწილობრივ შეიცავს პოლიტიკურ განცხადებებს, ესეც კი საკმარისი იქნება, ამ ეჭვის დამადასტურებელ ფაქტორად რომ მოვიყვანოთ“, - განაცხადა მეუფე დავითმა.

მიტროპოლიტმა ასევე დასძინა: „მეუფე სტეფანეს ნათქვამს თუკი ვერწმუნებით და ალბათ, ეს სარწმუნოა, მეუფე პეტრეს აქვს თავის ყოფილ სამღვდელოებასთან ურთიერთობა“.

„ძნელია იმის თქმა, თუ რაზე ლაპარაკობენ, მაგრამ შეიძლება რაღაც ბიძგისა და წაქეზების მომენტები იყოს. რადგან ყოფილი მღვდელმთავარი თავის ყოფილ სასულიერო პირებთან თუკი სატელეფონო საუბრებშია ჩართული, იქ ყველაფერი შესაძლებელია“, - განაცხადა მეუფე დავითმა.

ჭყონდიდის ეპარქიაში გუშინ მრევლისა და სასულიერო პირების ნაწილი მიტრპოლიტ სტეფანეს დაუპირისპირდა. ხმაური მოჰყვა ეპისკოპოსის ბრძანებას, რომლის თანახმადაც, ეპარქიაში მოღვაწე ორ სასულიერო პირს მღვდელმსახურების უფლება შეუჩერდა.

მარტვილისა და ჭყონდიდის ეპარქიაში მომხდარ ფაქტზე გამოძიება დაიწყო. ჭყონდიდის ეპარქიაში ერთმანეთს მღვდელმსახურები და მრევლის ნაწილი დაუპირისპირდა.

ჭყონდიდის ახალმა მიტროპოლიტმა ეპარქიის ორ დიაკონს მღვდელმოქმედებებში მონაწილეობა აუკრძალა.