კახა კალაძე: დარწმუნებული ვარ, ჩვენს ქალაქში განხორციელებული მნიშვნელოვანი პროექტებით ყველა თბილისელი იამაყებს

კახა კალაძემ განმარტა, რას პროექტებს გეგმავს თბილისის მერია მიმდინარე წლიდან. ამის შესახებ თბილისის მერმა „იმედის“ გადაცემა „დედაქალაქში“ ისაუბრა. მისი თქმით, ქალაქში განხორციელებული მნიშვნელოვანი პროექტებით ყველა თბილისელი იამაყებს.

„წელს ვიწყებთ ბაგებისა და საბურთალოს დამაკავშირებელი საავტომობილო ხიდის მშენებლობას, ასევე აქტიურად მიმდინარეობს გელოვანისა და მაჭავარიანის ქუჩების დამაკავშირებელი 2-კილომეტრიანი ბეტონის გზის მშენებლობა, რომელიც ზაფხულში დასრულდება. მალე დავიწყებთ ქეთევან წამებულის გამზირის სრულ რეაბილიტაციას.

მოსახლეობაც ხედავს, რომ მხოლოდ გზის საფარის ცვლილებით არ შემოვიფარგლებით, ჩვენ გვინდა ფუნდამენტური ცვლილებები განვახორციელოთ თავისი მიწისქვეშა კომუნიკაციით, განათებით. გვინდა ყველაფერი უმაღლეს დონეზე გაკეთდეს. ძალიან დიდი ყურადღება ექცევა რეკრეაციულ სივრცეებს და მეამაყება, რომ ჩემს თანაგუნდელებთან ერთად შევძელით უამრავი სკვერის რეაბილიტაცია, უამრავი პარკის განახლება. დაწყებული გვაქვს „ვაკის პარკის“ მოწესრიგება, განახლდა „მზიურის პარკი“. „ფონდი ქართუ“ საჩუქრად მუნიციპალიტეტს გადმოსცემს იპოდრომის ტერიტორიას. უზარმაზარი სივრცე შეიქმნება ქალაქში, რომელიც იქნება დასასვენებელი პარკი და მადლობა „ფონდ ქართუს“ ამ პროექტის განხორციელებისთვის“, - განაცხადა კახა კალაძემ.