ეკატერინე ტიკარაძე პატრიარქს შეხვდა

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი ეკატერინე ტიკარაძე სრულიად საქართველოს კათოლიკოს პატრიარქს ილია მეორეს შეხვდა. მინისტრმა პატრიარქს დეტალურად მიაწოდა ინფორმაცია ვაქცინაციის პროცესთან დაკავშირებით და ქვეყანაში არსებული ეპიდვითარება გააცნო. საუბარი შეეხო, COVID-19-ის საწინაaღმდეგო ვაქცინის AstraZeneca-ს უსაფრთხოებას, რისკებსა და დადებით შედეგებს.

„პატრიარქთან შეხვედრის მიზანი იყო მისი ინფორმირება, როგორ არის დაგეგმილი ვაქცინაციის პროცესი, რას მოიცავს ვაქცინაცია და რა რისკები და დადებითი შედეგები შეიძლება ჰქონდეს მას მოქალაქეებისთვის. საპატრიარქო მიესალმება ყველა იმ გონივრულ ნაბიჯს, რომელიც ჯანდაცვის სამინისტროს მხრიდან მოქალაქეების უსაფრთხოების დასაცავად გადაიდგმება. ვისაუბრეთ დეტალურად ნიღბის ტარების მნიშვნელობაზე . ასევე აღვნიშნეთ, რომ ვაქცინაციის პროცესი არის ნებაყოფლობითი, თუმცა ერთ-ერთი ყველაზე ეფექტური საშუალება, რომ საქართველომ და მსოფლიომ დაძლიოს არსებული გამოწვევა“, -ამის შესახებ ჯანდაცვის მინისტრმა საპატრიარქოში კათოლიკოს-პატრიარქთან, ილია მეორესთან შეხვედრის შემდეგ განაცხადა.

ეკატერინე ტიკარაძის განცხადებით, საქართველოს საპატრიარქო მხარს დაუჭერს ჯანდაცვის სამინისტროს ნებისმიერ გონივრულ გადაწყვეტილებას, რომელიც მოქალაქეების ჯანმრთელობის უზრუნველყოფისკენ იქნება მიმართული.

„საპატრიარქოს მხრიდან დაფიქსირდა მკვეთრი პოზიცია, რომ ისინი არ ჩაერთვებიან აქტიურ პროპაგანდაში, თუმცა ისინი მიესალმებიან და მხარს დაუჭერენ ჯანდაცვის სამინისტროს ნებისმიერ გონივრულ გადაწყვეტილებას, რომელიც მიმართულია ჩვენი მოქალაქეების ჯანმრთელობის უზრუნველყოფისკენ. პატრიარქი მომხრეა, რომ ვაქცინა ნებაყოფლობითი იყოს“, - განაცხადა ეკატერინე ტიკარაძემ.

მინისტრის თქმით, საქართველო მსოფლიო ჯანდაცვის ორგანიზაციის მიერ გაცემულ რეკომენდაციას ეყრდნობა, რომ ქვეყნებმა არ უნდა შეაჩერონ AstraZeneca-ს გამოყენება. ეკატერინე ტიკარაძემ გამოთქვა მზაობა ნებისმიერი სახის შეხვედრებისთვის და აღნიშნა, რომ მათთვის საქართველოს ეკლესიასთან თანამშრომლობა დიდი პატივია.