ნინია მაჭარაშვილი: თბილისის ყველა სკოლაში, მიუხედავად იმისა, არსებობდა თუ არა იქ ბიბლიოთეკა, სპეციალურ სამკითხველო კუთხეს შევქმენით

თბილისის აბსოლუტურად ყველა სკოლაში, მიუხედავად იმისა, არსებობდა თუ არა იქ ბიბლიოთეკა, ყველასთვის შევქმენით სპეციალურ სამკითხველო კუთხეს, შესაბამისად, ეს არ ადაპტირდება სახელმძღვანელოებში, თუმცა ყველა მოსწავლეს ექნება საშუალება, რომ თავისივე სკოლაში ნებისმიერი წიგნი წაიკითხოს, - ამის შესახებ „თბილისი-წიგნის მსოფლიო დედაქალაქი 2021“-ის პროექტის დირექტორმა, ნინია მაჭარაშვილმა „იმედის“ გადაცემა „დედაქალაქში“ განაცხადა.

მისივე განცხადებით, სკოლების ბიბლიოთეკების გამდიდრების საშუალებას იძლევა პროექტი „თბილისი-წიგნის მსოფლიო დედაქალაქი 2021“, რომელიც არა მხოლოდ სკოლებზე, არამედ არაერთ ფოკუსჯგუფზეა გათვლილი.

„ეს პროექტი მრავალ ფოკუსჯფუფს მოიცავს: გამომცემლებს, მთარგმნელებს, ამ სფეროში დასაქმებულ ადამიანებს, ბიბლიოთეკებისა და უპირველეს ყოვლისა, ყველა ასაკობრივი კატეგორიის მკითხველს. ჩვენი ერთ-ერთი პრიორიტეტია მოზარდი მკითხველი, რომელიც კითხვის გამომუშავების უნარ-ჩვევებს იძენს. მათ შორის, ერთ-ერთი მნიშვნელოვანია ვაუჩერიზაცია, რაც იმას ნიშნავს, რომ თბილისის ყველა სკოლაში შევა ახალი საკითხავი ლიტერატურა. ეს გახლავთ თანამედროვე ქართველი ავტორების მხატვრული ლიტერატურა. ეს პროექტი რამდენიმე კუთხით არის მნიშვნელოვანი. პირველია ის, რომ თბილისში, აბსოლუტურად ყველა მოსწავლეს ექნება იმის საშუალება, რომ წიგნთან თანაბარი ხელმისაწვდომობა ჰქონდეს. ჩვენ ვყიდულობთ წიგნებს გამომცემლობებისგან, რაც ნიშნავს, რომ ხელს ვუწყობთ ამ საქმიანობის წარმატებაში და გარდა ამისა, თვიდან თვემდე, შესაძლებლობებიდან გამომდინარე, თანამედროვე ქართველ ავტორებს ვუწყობთ სკოლებში ღონისძიებებს, რათა ისინი ადგილზე შეხვდნენ მოსწავლეებს და დააინტერესონ ისინი. ეს ყველაფერი პროექტის ფარგლებში განხორციელდება. ჩვენ თბილისის აბსოლუტურად ყველა სკოლაში, მიუხედავად იმისა, არსებობდა თუ არა იქ ბიბლიოთეკა, ყველასთვის შევქმენით სპეციალურ სამკითხველო კუთხეს, შესაბამისად ეს არ ადაპტირდება სახელმძღვანელოებში, თუმცა ყველა მოსწავლეს ექნება საშუალება, რომ თავისივე სკოლაში ნებისმიერი წიგნი წაიკითხოს“, - განაცხადა ნინია მაჭარაშვილმა.

მისი თქმით, პროექტის ფარგლებში, საქართველოში, მწერალთა სახლთან თანამშრომლობით, პირველად გაიხსნება მუზეუმი, სადაც გამოიფინება ქართველი რეპრესირებული ავტორების შესახებ ინფორმაცია და რეკვიზიტები, რაც მისივე განმარტებით, ძალიან მნიშვნელოვანია.

„კონკრეტულად თბილისი, ერთი ქალაქი ხდება მსოფლიო წიგნის დედაქალაქი. იმის გამო, რომ მაქსიმალურად ყველა ადამიანისთვის მიგვეცა დასწრების შესაძლებლობა, ყველა ღონისძიებას დავაანონსებთ და დაველოდებით დამსწრეებს. გარდა ამისა, ეროვნულ ბიბლიოთეკასთან ერთად, მოსწავლეებს, რომლებიც რეგიონებში ცხოვრობენ, კონკრეტულად ვუგეგმავთ ღონისძიებათა ციკლს და ჩამოგვყავს, რომ დაესწრონ ამ ღონისძიებებს. აუცილებლად უნდა აღვნიშნო ილუსტრაციებისა და ქართული ხალხური ზღაპრების პირველი ქართული სკოლა და პირველი გამოფენის გამართვა. გარდა ამისა, აღსანიშნავია ილუსტრატორებიც. საქართველოში არაჩვეულებრივი ილუსტრატორები გვყავს, რომლებზეც ყოველთვის მაღალი მოთხოვნაა საერთაშორისო ბაზარზე. ჩვენი ილუსტრატორები არაერთხელ მოხვდნენ წამყვან პოზიციებზე და საქართველოში არ არსებობდა მათი ერთიანი კატალოგი, რომელიც აღწერდა მათ შემოქმედებას და საშუალებას მისცემდა მათ, რომ საერთაშორისო ბაზრობებზე აქტიურად გაყიდულიყო მათი ნამუშევრები. სწორედ ამ პროექტის ფარგლებში შეიქმნება ქართველი ილუსტრატორების უდიდესი კატალოგი, რაც ძალიან მნიშვნელოვანი ამბავია“, - განაცხადა ნინია მაჭარაშვილმა.