სახელმწიფო ზრუნვის სააგენტოს უფროსი: ნამდვილად იყო დაწესებულებაში შესვლის პრობლემა, რომელსაც პანსიონი პანდემიით ხსნიდა

სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს უფროსი, მერი მაღლაფერიძე აცხადებს, რომ ნინოწმინდის ბავშვთა პანსიონში შესვლის პრობლემა არსებობდა და რომ ამას თავად პანსიონი კორონავირუსის პანდემიით ხსნიდა. მისივე განცხადებით, ახლა პრიორიტეტულია, პანსიონის ყველა ბენეფიციარი თავს დაცულად გრძნობდეს.

„ნამდვილად იყო დაწესებულებაში შესვლის პრობლემა, რომელსაც პანსიონი პანდემიით ხსნიდა. ჩვენს სოციალურ მუშაკს მუდმივად ჰქონდა სატელეფონო კავშირი. ბავშვებს აქვთ ტელეფონები. ჩვენ გვაქვს რეაგირების ძალიან მკაფიოდ გაწერილი პროტოკოლი, რომელსაც ვიცავთ და რომელსაც მომავალშიც აუცილებად დავიცავთ“, - აცხადებს მერი მაღლაფერიძე.

მისივე განცხადებით, სააგენტოსთვის მნიშვნელოვანია, თუ რას ამბობენ თავად ნინოწმინდის პანსიონის ბენეფიციარი ბავშვები.

„როდესაც ჩვენთვის ცნობილი ხდება რაიმე ტიპის ძალადობის ან ეჭვის შესახებ, ძალიან მკაფიოდაა გაწერილი ყველა იმ უწყების ვალდებულება, რომელმაც რეაგირება უნდა მოახდინოს. რა თქმა უნდა, ასეთი ტიპის განცხადებები ბავშვების მხრიდან, ჩვენთვის ძალიან მნიშვნელოვანია. ფსიქოლოგები და სოციალური მუშაკები ამ წუთებშიც მუშაობენ მათთან. უბრალოდ, არ მინდა, რომ ამ ბავშვების იდენტიფიცირება მოხდეს“, - აცხადებს მერი მაღლაფერიძე.

რამდენიმე წუთის წინ, ჯანდაცვის სამინისტროს წარმომადგენლებმა ნინოწმინდის პანსიონიდან რამდენიმე არასრულწლოვანი გამოიყვანეს.

ცოტა ხნის წინ, პანსიონში სახელმწიფო ზრუნვის სააგენტოს წარმომადგენლები შევიდნენ. ადგილზე არიან სოციალური მუშაკები და სამედიცინო საქმიანობის სახელმწიფო რეგულირების სააგენტოს წარმომადგენლებიც.

სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს მიერ დღეს გავრცელებული განცხადების თანახმად, ნინოწმინდის პანსიონის დატოვების სურვილი 6-მა არასრულწლოვანმა გამოთქვა და სააგენტომ უკვე უზრუნველყო მათი სხვა ზრუნვის ფორმაში გადაყვანა. სააგენტოს მიერ რამდენიმე საათის წინ გამოქვეყნებული განცხადების მიხედვით, კიდევ 10 ბავშვის გადაყვანაზე მიმდინარეობდა მუშაობა.

3 ივნისს შსს-მ ნინოწმინდის ბავშვთა პანსიონში აღსაზრდელების მიმართ შესაძლო დანაშაულის ჩადენის ფაქტებზე გამოძიება დაიწყო.

ნინოწმინდის ბავშვთა პანსიონში, სავარაუდო ძალადობის შესახებ, თავად ბენეფიციარები „ქრონიკასთან“ ალაპარაკდნენ. ერთ-ერთი ასეთი ფაქტი, მათივე თქმით, ორი დღის წინ მოხდა. არასრულწლოვნები ამბობენ, რომ შემთხვევების შესახებ მეუფე სპირიდონი არ იყო ინფორმირებული, მათზე აღმზრდელები ზემოქმედებნენ. რომელთა ნაწილი გათავისუფლებულია, თუმცა ნაწილი ისევ ადგილზე რჩება. კითხვაზე - იცოდა თუ არა მეუფე სპირიდონმა ამ ფაქტების შესახებ, ბავშვები ამბობენ, რომ მათ ვერ შეძლეს მეუფესთვის ეთქვათ, როგორ ძალადობდნენ მათზე აღმზრდელები და ასევე ვერ მოახერხეს, რომ ეს ამბავი ვინმესთვის ეთქვათ.