ნინო ლომჯარია ნინოწმინდის პანსიონზე: საგანგაშო იყო ბოლო ვიზიტისას აღმოჩენილი გარემოება - სოციალური მუშაკიც კი, დაწესებულებაში 10 თვის განმავლობაში ვერ შედიოდა

სახალხო დამცველმა, რომელიც პარლამენტში, ადამიანის უფლებათა კომიტეტის სხდომაზე, გასული წლის ანგარიშს წარადგენს, ყურადღება ნინოწმინდის ბავშვთა პანსიონზეც გაამახვილა. ნინო ლომჯარიას თქმით, საგანგაშოა ფაქტი, რომ, რამდენიმე თვის განმავლობაში, პანსიონში შესვლისა და მუშაობის საშუალება სოციალურ მუშაკებსაც კი არ ეძლეოდათ.

„ჩვენ არაერთ ანგარიშში მივუთითებდით ნინოწმინდის პანსიონში არსებულ მდგომარეობაზე. 2015 და 2018 წლებში ჩატარებული მონიტორინგი ცხადყოფდა ბავშვის ფიზიკური დასჯის შემთხვევებს. ასევე, მივუთითებდით სოციალურ იზოლაციასა და ბავშვების საჭიროების გაუთვალისწინებლობაზე. საგანგაშო იყო ბოლო ვიზიტის ფარგლებში აღმოჩენილი გარემოება - სოციალური მუშაკიც კი, 10 თვის განმავლობაში ვერ შედიოდა დაწესებულებაში, იქ, სადაც ბავშვები სახელმწიფო ზრუნვის ქვეშ იყვნენ“, - აღნიშნა ნინო ლოჯარიამ.

ნინო ლომჯარიას ანგარიშის წარდგენას, დეპუტატების გარდა, სხვადასხვა უწყების მინისტრების მოადგილეებიც ესწრებიან.

3 ივნისს შსს-მ ნინოწმინდის ბავშვთა პანსიონში აღსაზრდელების მიმართ შესაძლო დანაშაულის ჩადენის ფაქტებზე გამოძიება დაიწყო.

ნინოწმინდის ბავშვთა პანსიონში, სავარაუდო ძალადობის შესახებ, თავად ბენეფიციარებმა „ქრონიკასთან“ ისაუბრეს. არასრულწლოვნები ამბობენ, რომ შემთხვევების შესახებ მეუფე სპირიდონი არ იყო ინფორმირებული, მათზე აღმზრდელები ზემოქმედებნენ. რომელთა ნაწილი გათავისუფლებულია, თუმცა ნაწილი ისევ ადგილზე რჩება. კითხვაზე - იცოდა თუ არა მეუფე სპირიდონმა ამ ფაქტების შესახებ, ბავშვები ამბობენ, რომ მათ ვერ შეძლეს მეუფესთვის ეთქვათ, როგორ ძალადობდნენ მათზე აღმზრდელები და ასევე ვერ მოახერხეს, რომ ეს ამბავი ვინმესთვის ეთქვათ.

5 ივნისს, თბილისის საქალაქო სასამართლოს დროებითი განჩინების მიხედვით, „პარტნიორობა ადამიანის უფლებებისთვის“ შუამდგომლობა ნინოწმინდის ბავშვთა პანსიონიდან ყველა ბავშვის გაყვანასთან დაკავშირებით ნაწილობრივ დაკმაყოფილდა.

მეუფე იაკობის თქმით, ნინოწმინდის პანსიონში იმდენი ბავშვი დარჩება, რამდენსაცმოესურვება.

14 ივნისს ცნობილი გახდა, რომ ნინოწმინდის პანსიონს მეუფე იაკობი უხელმძღვანელებს.

სახალხო დამცველი ნინოწმინდის პანსიონში მომავალ კვირას შევა.