ირაკლი ქადაგიშვილი პრაიდზე: დარწმუნებული ვარ, ხელისუფლება ყველაფერს გააკეთებს, რომ წესრიგი და უსაფრთხოება დაცული იყოს

დარწმუნებული ვარ, ხელისუფლება ყველაფერს გააკეთებს, რომ წესრიგი და უსაფრთხოება დაცული იყოს, - ამის შესახებ საპარლამენტო უმრავლესობის წევრმა, ირაკლი ქადაგიშვილმა „თბილისი პრაიდის“ კვირეულთან დაკავშირებით განაცხადა.

მისივე შეფასებით, მსგავსი ტიპის აქციები უფრო ემსახურება ვითარების დაძაბვას და არა აღნიშნული ადამიანების უფლებების დაცვას. ქადაგიშვილის თქმით, საქართველოში ყველა ადამიანის უფლება კონსტიტუციით და კანონით დაცულია.

„დარწმუნებული ვარ, ხელისუფლება ყველაფერს გააკეთებს, რომ წესრიგი და უსაფრთხოება დაცული იყოს. მეორე, რასაც ყოველთვის ვამბობდი, რომ ასეთი ტიპის აქცია, რა თქმა უნდა, გამოიწვევდა ძალიან დიდ ვნებათაღელვას საზოგადოებაში. ზოგადად, მაინც მიმაჩნია, რომ ასეთი ტიპის აქციები გარკვეულწილად, უფრო ემსახურება სიტუაციის დაძაბვას და, მე თუ მკითხავთ, რეალურად არ არის დაკავშირებული არც იმ ადამიანების უფლებების დაცვასთან, ვისთვისაც თითქოს, ეს ყველაფერი ტარდება. ჩვენს ქვეყანაში კონსტიტუციით, კანონით დაცულია ყველა ადამიანის უფლება, მათ შორის, სექსუალური უმცირესობების უფლებაზე სპეციალური კანონია მიღებული. ამით მათი უფლებები დაცულია. პირადად ჩემი, როგორც ერთი მოქალაქის აზრია, დემონსტრირება იმისა, რომ მე ვარ ამა თუ იმ სექსუალური მიმდინარეობის ადამიანი, რომელიც იწვევს საზოგადოებაში ასეთ ვნებათაღელვას, არ უნდა იყოს პრიორიტეტული“, – განაცხადა ირაკლი ქადაგიშვილმა.

ხვალ, თბილისში, „თბილისი პრაიდი“ მარშს გამართავს. ამავე დღეს, საქართველოს საპატრიარქოს მოწოდებით, მოქალაქეთა ნაწილი, ქაშუეთის ეკლესიასთან შეიკრიბება.

„5 ივლისს, 17:00 საათზე, შევიკრიბოთ ქაშუეთის წმინდა გიორგის ტაძართან, აღვავლინოთ ყოვლადწმინდა ღვთისმშობლის პარაკლისი და მსოფლიოს ვაჩვენოთ, რომ ჩვენ ჩვენს ღირსებას ვიცავთ და გადაგვარების თავსმოხვეული მცდელობა ჩვენთვის მიუღებელია“, - აღნიშნულია საპატრიარქოს მიერ 3 ივლისს გავრცელებულ განცხადებაში.

ამასთან, საპატრიარქო მიმართავს მოსახლეობას, მშვიდობიანად დააფიქსირონ პროტესტი და „არ აჰყვნენ ძალადობრივი კონფრონტაციისათვის მიზანმიმართულ პროვოკაციას“.