ანდრია ჯაღმაიძე: გახელაძესთან დაკავშირებით, პოზიტიურ მოლოდინში ვართ

საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე აცხადებს, რომ ოკუპანტების მიერ დაკავებულ ზაზა გახელაძესთან დაკავშირებით, სიტუაცია იმედისმომცემია.

„გახელაძესთან დაკავშირებით, მოლოდინში ვართ, არსებობს რაღაცა იმედები, პროცესის დაძვრის მოლოდინში ვართ, წინასწარ არ მინდა, რამე ვთქვა. ვადებს ვერ გეტყვით, პოზიტიურის მოლოდინში ვართ," - აცხადებს ანდრია ჯაღმაიძე.

22 ივნისს ზაზა გახელაძის ოჯახს საპატრიარქოს წარმომადგენლები ესტუმრნენ. ცხინვალის ციხეში მყოფი უკანონო პატიმრის გათავისუფლებაზე ილია მეორემ რუსეთის პატრიარქს წერილი მისწერა და ხელისუფლებასთან შუამდგომლობას სთხოვა.

დღეს, გორის მუნიციპალიტეტის სოფელ ერგნეთში, ინციდენტების პრევენციისა და მათზე რეაგირების მექანიზმის (IPRM) 101-ე შეხვედრა გაიმართა. სახელმწიფო უსაფრთხოების სამსახურის წარმომადგენელმა, ირაკლი ანთაძემ შეხვედრის დასრულების შემდეგ განაცხადა, რომ „ზაზა გახელაძის გათავისუფლების საკითხთან დაკავშირებით, იკვეთება გარკვეული შესაძლებლობები, ამასთან დაკავშირებით, შედგა ძალიან ინტენსიური დისკუსია“.

ბოლო შეხვედრა 15 ივნისს გაიმართა და მას ეუთოს გენერალურმა მდივანი, ჰელგა მარია შმიდიც ესწრებოდა. შეხვედრის დასრულების შემდეგ, სახელმწიფო უსაფრთხოების სამსახურის ანალიტიკური დეპარტამენტის ხელმძღვანელის მოადგილემ, ირაკლი ანთაძემ განაცხადა, რომ ზაზა გახელაძის ოჯახმა, შესაძლოა, ცხინვალში ჩასვლა და მისი მონახულება შეძლოს.

ოკუპირებული ცხინვალის ე.წ.-მა სასამართლომ, ზაზა გახელაძეს 12 წლითა და 6 თვით უკანონო პატიმრობა მიუსაჯა. მას ბრალდება რუსეთის ფედერაციის სისხლის სამართლის კოდექსის ორი მუხლით ედავებოდა: 317-ე მუხლით, რომელიც სამხედრო მოსამსახურის სიცოცხლის ხელყოფის მცდელობად კვალიფიცირდება და 322-ე მუხლით, რაც „სახელმწიფო საზღვრის უკანონოდ გადაკვეთას“ გულისხმობს.

ოკუპანტებმა ზაზა გახელაძე 2020 წლის 11 ივლისს დაჭრეს და დააკავეს.