ქაბულში არსებული არეულობის გამო, საქართველოს მოქალაქეები აეროპორტამდე ვერ მივიდნენ - მათი ტრანსპორტირება ჯავშნიანი ავტომობილებით იგეგმება

საქართველოს საგარეო საქმეთა მინისტრის მოადგილემ, ალექსანდრე ხვთისიაშვილმა, მთავრობის ადმინისტრაციაში გამართულ ბრიფინგზე, ავღანეთიდან საქართველოს მოქალაქეების დაბრუნების შესახებ ისაუბრა.

მისი თქმით, პრემიერის დავალებით, მთავრობა აქტიურად მუშაობს ქვეყნიდან მათ გამოსაყვანად.

„ჩვენი მოქალაქეების საქართველოში დასაბრუნებლად, ჩვენ უზრუნველყოფილი გვქონდა შესაბამისი რეისი ქაბულის აეროპორტიდან. ეს შეთანხმებული გვქონდა ჩვენს პარტნიორ ქვეყნებთან. ჩვენს მოქალაქეებს ვთხოვეთ, მისულიყვნენ აეროპორტში. სამწუხაროდ, იმ მომენტისთვის, როდესაც რეისი იყო დაგეგმილი, ეს ვერ მოხერხდა და უკრაინული ბორტი მათ გარეშე გამოფრინდა. ჩვენ საუბარი გვქონდა სხვა პარტნიორ ქვეყნებთან. მათი მხრიდან, არის დასტური, რომ მათი გამოყვანა მოხერხდება, თუ ისინი აეროპორტში მოხვდებიან. კიდევ რამდენიმე რეისია დაგეგმილი. ღამის განმავლობაში, ქაბულში მდგომარეობა დაძაბული იყო და სამწუხაროდ, მათ აეროპორტამდე მისვლა ვერ მოახერხეს. ამიტომ, არჩიეს, ბაზაზე დარჩენილიყვნენ. ახლა ვმუშაობთ ბაზიდან აეროპორტში გადაყვანაზე. თურქულმა მხარემ დაგვიდასტურა მზაობა, რომ დაგვეხმარებიან, ჯავშნიანი მანქანებით მიიყვანონ ქაბულის აეროპორტში. ახლა მიმდინარეობს ეს ოპერაცია და იმედია, უახლეს მომავალში, ისინი ქაბულის აეროპორტში იქნებიან, საიდანაც ასევე ჩვენი პარტნიორები უზრუნველყოფენ მათ გადმოყვანას საქართველოში. ამასთან ერთად, მიღებულია გადაწყვეტილება, რომ საქართველოს მთავრობა გააგზავნის ცალკე ბორტს მათ წამოსაყვანად. შესაბამისად, ახლა მიმდინარეობს ნებართვებთან დაკავშირებული სამუშაოები, ჩვენი თვითმფრინავი ჩაფრინდება ქაბულში და უზრუნველყოფს მათ წამოყვანას უკვე ჩვენი ბორტით“, - აღნიშნა ალექსანდრე ღვთისიაშვილმა.

ავღანეთში საქართველოს 23 მოქალაქეა. საგარეო უწყების ცნობით, ისინი არა მოქმედი, არამედ ყოფილი სამხედროები არიან და კერძო კომპანიებში მუშაობენ. 17 კაცი დასაქმებულია კანადურ კომპანიაში, 6 - ამერიკულში.

გარდა ქუჩებში არსებული დაძაბულობისა, ქაბულის აეროპორტშიც ქაოსია - ადგილობრივი მოსახლეობა თვითმფრინავებში ასვლასა და ქალაქიდან გაღწევას ცდილობს. Reuters-ი წერს, რომ ქაოსს, სულ მცირე, 5 ადამიანი ემსხვერპლა.

15 აგვისტოს „თალიბანის“ წევრები ქაბულში შევიდნენ. ამის შემდეგ აშშ-ის საელჩოდან დიპლომატების ევაკუაცია ვერტმფრენით განხორციელდა. ავღანეთის პრეზიდენტი აშრაფ ღანი ტაჯიკეთში გაიქცა.