თეა წულუკიანი: გვყავს ნიჩბოსნები, რომლებსაც არ აქვთ ნავი და ნიჩაბი, მორბენლები, რომლებსაც არა აქვთ სარბენი ბილიკები, ცხენოსანთა ფედერაცია, რომელსაც არ ჰყავს ცხენი, ასეთია რეალობა

ჩვენ გვყავს ნიჩბოსნები, რომლებსაც არ აქვთ ნავი და ნიჩაბი, გვყავს ველოსპორტსმენები, რომელთა ველოსიპედსაც ბორბალი სძვრება, გვყავს მორბენლები, რომლებსაც არა აქვთ სარბენი ბილიკები და გვაქვს ცხენოსანთა ფედერაცია, რომელსაც არ ჰყავს ცხენი, ასეთია რეალობა, - ამის შესახებ საქართველოს კულტურისა და სპორტის მინისტრმა, თეა წულუკიანმა პარლამენტში წლიური მოხსენებისას განაცხადა.

მისი თქმით, დღეს საქართველოში სამინისტროს მიერ აღიარებულია 93 სპორტული ფედერაცია, მათ სხვადასხვა ფორმა აქვთ სამართლებრივად და ამ 93 ორგანიზაციიდან 65 სპორტული ფედერაცია, კავშირი და ასოციაცია ჯამურად საქართველოს ბიუჯეტიდან იღებს 98 მილიონ 600 ათას ლარს, აქედან ყველაზე მეტი დაფინანსება გაწერილია რაგბის კავშირისთვის, რომლის ბიუჯეტი წილობრივადაც სამინისტროდან მიღებული გახლავთ 27 მილიონ 500 ათასი ლარი.

„მეორე ადგილზეა კალათბურთი, რომელიც სამინისტროდან იღებდა 13 მილიონ 580 ათას ლარს. ეს არის ის ორი უმნიშვნელოვანესი სახეობა ქართულ სპორტში, რომელიც ყველაზე მეტად ფინანსდება ჩვენი მხრიდან. მინდა, მოგახსენოთ, რომ ფედერაციები არიან არათანაბარ მდგომარეობაში, ვგულისხმობ უთანასწორობას დაფინანსების მხრივ, თუ გნებავთ თვალშისაცემ უთანასწორობას ინფრასტრუქტურისა და აღჭურვილობის მხრივ. არავინ უარყოფს და პირველ რიგში, მე, რომ რაგბი და კალათბურთი არის რა თქმა უნდა, სპორტის ის სახეობები, რომლითაც ვამაყობთ, რაგბი ჩვენი თამაშია და ასევე კალათბურთიც ჩვენი თამაშია, მაგრამ ძალიან მნიშვნელოვანია, რომ სხვა სახეობებსაც სამინისტრომ მიაქციოს უფრო მეტი ყურადღება. ჩემი დანიშვნის შემდეგ, ერთ-ერთ პრიორიტეტად ვაქციეთ, რომ სპორტის სახეობები იმის მიხედვით, რა პოტენციალი აქვთ, იყვნენ თანასწორ მდგომარეობაში. ეს არ არის მარტივად მისაღწევი საქმე, როდესაც ჩვენ ვხედავთ, რომ ერთი მხრივ, უნდა განვავითაროთ ის, რითაც უკვე ვამაყობთ და მე, როგორც ერთი ქართველი, ძალიან ამაყი ვიყავი, როდესაც საფრანგეთში რამდენიმე დღის წინ დავესწარი რაგბის მატჩს და ჩვენმა ნაკრებმა გვასახელა საფრანგეთის გუნდთან. ეს თამაში იყო არამხოლოდ საინტერესო, არამედ საამაყოც. ასევე ვიამაყეთ, რამდენიმე დღის წინ, როდესაც საქართველოს კალათბურთის ეროვნულმა ნაკრებმა და ჩვენმა მსოფლიო დონის სპორტსმენებმა უკრაინასთან მატჩი მოიგეს თბილისში, ეს უნდა გაგრძელდეს, ამგვარი სპორტის სახეობებისთვის ხელშეწყობა, ეს ორი სახეობა მე პირობითად გამოვყავი მაგალითისთვის, თუმცა რა თქმა უნდა, ის მაღალი მიღწევები, რაც სპორტის არაერთ სახეობას აქვს, დრო არ მეყოფა რომ ჩამოვთვალო, მაგრამ მინდა, ვაჩვენო კონტრასტი. ამის ფონზე და ამის საპირისპიროდ - ჩვენ გვყავს ნიჩბოსნები, რომლებსაც არ აქვთ ნავი და ნიჩაბი, გვყავს ველოსპორტსმენები, რომლების ველოსიპედსაც ბორბალი სძვრება და გვყავს მორბენლები, რომლებსაც არა აქვთ სარბენი ბილიკები, გვყავს ცხენოსანთა ფედერაცია, რომელსაც არ ჰყავს ცხენი, ასეთია რეალობა“, - განაცხადა თეა წულუკიანმა.

მისივე თქმით, ეს უთანასწორობა უნდა გასწორდეს, მშვილდოსნებს მაგალითისთვის სჭირდებათ თბილისში ბაზა, რათა ივარჯიშონ და ახალგაზრდა მშვილდოსნები არ ვარჯიშობდნენ თბილისის კორპუსების სარდაფებში სროლაში.

„ძალიან მნიშვნელოვანია, რომ ჩვენს ტანმოვარჯიშეებს ჰქონდეთ ასევე თბილისში საწვრთნელი სათანადო ბაზა, აღარაფერს ვამბობ მოციგურავეებზე, რომლებსაც არ აქვთ საციგურაო სათანადო ინფრასტრუქტურა და მათ უწევთ სხვა უცხო ქვეყანაში ვარჯიში. რა თქმა უნდა, ყველას გვიხარია, ტაშსაც ვუკრავთ და მეც ასე ვიყავი, ვიდრე სპორტის მინისტრი გავხდებოდი, რომ რა კარგია, როგორ კარგად ციგურაობენ, როგორ კარგად ნიჩბოსნობენ, როგორ კარგად წარმოაჩენენ საქართველოს, მაგრამ ამის უკან დგას ძალიან დიდი პრობლემები, დიდი შრომა. თითოეულ სპორტსმენს, არის ის თუ არ არის სამინისტროს მხრიდან დიდი ბიუჯეტით ხელშეწყობილი, მინდა, ამ ტრიბუნიდან ვუთხრა, ძალიან დიდი შრომისა და გამძლეობისთვის განსაკუთრებული მადლობა“, - განაცხადა თეა წულუკიანმა.