ვიქტორ სირელსონი: ჩემი მიზანი ყოველთვის იყო, რომ ნიუ-იორკში მცხოვრები ქართველი ემიგრანტების ცხოვრება წარმატებული ყოფილიყო

განსაკუთრებული ღვაწლის მქონე დიასპორის წარმომადგენლების დაჯილდოების ოფიციალური ცერემონიაზე, საქველმოქმედო საქმიანობაში შეტანილი წვლილისთვის ჯილდოს მფლობელი აშშ-ის მოქალაქე ვიქტორ სირელსონი გახდა, რომელიც 1996 წლიდან მხარს უჭერს ამერიკაში მოღვაწე ქართველ ხელოვანებს. ინფორმაციას ამის შესახებ საგარეო საქმეთა სამინისტრო ავრცელებს. უწყების ცნობით, მან ქალაქ ნიუ-იორკში დააარსა ქართული კულტურის ცენტრი „Dancing Crane”.

„ვიქტორ სირელსონის მეშვეობით ქართულმა კულტურამ აშშ-ში მრავალი თაყვანისმცემელი შეიძინა. ქართული კულტურის ცენტრთან წარმატებით ფუნქციონირებს საკვირაო სკოლა, მუსიკის სკოლა, ქორეოგრაფიული ანსამბლი, ვაჟთა ვოკალური ჯგუფი „ზეკარი“ და ნიუ-იორკის ქართული თეატრი. ვიქტორ სირელსონის ბოლო პროექტია „ქართული იავნანა“, რომელიც მან ნიუ იორკის (ბრუკლინის) ფოლკლორული ხელოვნების ფონდისთვის შექმნა.

„მინდა აღვნიშნო, რომ ჩემი მთავარი მიზანი ყოველთვის იყო ნიუ-იორკში მცხოვრები ქართველი ემიგრანტების ცხოვრება ყოფილიყო წარმატებული და ძალიან მადლიერი ვარ, რომ ამის გაკეთება შევძელი ნიუ-იორკის ხელოვნების საზოგადოებასთან ერთად. პირველ რიგში მადლობას ვუხდი საქართველოს საგარეო საქმეთა სამინისტროს დაფასებისთვის, ნიუ-იორკში საქართველოს საკონსულოს, მადლობას ვუხდი შეერთებულ შტატებში არსებულ ყველა იმ ორგანიზაციას, რომელმაც მხარი დაუჭირა ჩვენს მუშაობას ქართველებისა და საქართველოს პოპულარიზაციისთვის“, - განაცხადა ვიქტორ სირელსონმა დაჯილდოების ცერემონიაზე.

სირელსონის თქმით, ახლა ნიუ-იორკში ბევრმა იცის იცის საქართველოს შესახებ, რაც მას დიდ სიხარულს გვრის.

საქართველოს საგარეო საქმეთა სამინისტროს ორგანიზებით, გაიმართა განსაკუთრებული ღვაწლის მქონე დიასპორის წარმომადგენლების დაჯილდოების ოფიციალური ცერემონია.

„დიასპორის დაჯილდოება 2021“ ვიცე-პრემიერმა, საგარეო საქმეთა მინისტრმა დავით ზალკალიანმა გახსნა. ღონისძიებას საქართველოს საკანონმდებლო და აღმასრულებელი ხელისუფლების წარმომადგენლები და სხვა მოწვეული სტუმრები დაესწრნენ.

„დიასპორის დაჯილდოება 2021“-ის მიზანია საზღვარგარეთ მცხოვრები თანამემამულეების დამსახურების აღიარება, რომლებმაც პროფესიულ წარმატებებს მიაღწიეს ადგილსამყოფელ ქვეყნებში და ასევე, თავიანთი წვლილი შეიტანეს საქართველოს განვითარების საქმეში და საქართველოს იმიჯის, ქართული კულტურის, სპორტის და მეცნიერების პოპულარიზაციაში.

გამარჯვებულები რამდენიმე ნომინაციაში გამოვლინდნენ. ჯილდო ქართული კულტურის პოპულარიზაციაში შეტანილი წვლილისათვის გადაეცათ ამერიკაში მოღვაწე მსახიობს და რეჟისორს ირაკლი კავსაძეს, პიანისტ ლექსო თორაძეს და თურქეთში ქართული დიასპორის წარმომადგენელს ომარ ფარუქ დემირთაშს. მეცნიერების განვითარებაში შეტანილი წვლილისათვის დაჯილდოვდნენ საფრანგეთში მოღვაწე მეცნიერი და მთარგმნელი გასტონ ბუაჩიძე და ოქსფორდში ქართული ენის კურსების ხელმძღვანელი ლია ჩოკოშვილი.

სპორტის განვითარებაში შეტანილი წვლილისთვის ჯილდო გადაეცა წარმატებულ ქართველ კიკბოქსიორს გიგა ჭიკაძეს, ხოლო სახალხო დიპლომატიაში შეტანილი წვლილისათვის ჯილდოები გადასცეს ამერიკაში მოღვაწე ქართველ ბიზნესმენს მამუკა წერეთელს და სლოვაკეთში მოღვაწე ქართველ ბიზნესმენს და მეცენატს ნოდარ გიორგაძეს.

საქველმოქმედო საქმიანობაში შეტანილი წვლილისთვის ჯილდოს მფლობელები გახდა ხატია ხაბულიანი, რომელიც ეხმარება რუსთავის ბავშვთა და მოხუცებულთა თავშესაფარს და ნიდერლანდებში ჩაატარა არაერთი საქველმოქმედო კონცერტი და ვიქტორ სირელსონი, რომელიც 1996 წლიდან მხარს უჭერს ამერიკაში წასულ ქართველ ხელოვანებს და დააარსა ქართული ცეკვისა და სიმღერის არაერთი ჯგუფი. ხოლო ნომინაციაში საქართველოს უცხოელი მეგობარი ჯილდოები გადაეცათ ენდერს ვინბუშს, რომელიც 90-იანი წლებიდან არის საქართველოს ლობისტი ამერიკაში და ლასლო ბორჰის, რომელმაც ბუდაპეშტის უნივერსიტეტში დააარსა ქართველოლოგიის კათედრა.

აღნიშნული ღონისძიება გაიმართა მიგრაციის პოლიტიკის განვითარების საერთაშორისო ცენტრთან (ICMPD) და ევროკავშირის მიერ დაფინანსებულ პროექტთან ENIGMMA (მიგრაციის მართვის გაძლიერება საქართველოში) თანამშრომლობით“, - წერია უწყების ინფორმაციაში.