თამარ გაბუნია: თუ შესაძლებელია რაიმე ადმინისტრაციული და დოკუმენტაციასთან დაკავშირებული სამუშაოს შემსუბუქება, რაც ოჯახის ექიმებს დროს ართმევს, მზად ვართ, ეს საკითხი განვიხილოთ

ჯანდაცვის მინისტრის მოადგილის, თამარ გაბუნიას განცხადებით, 24 იანვარს, ჯანდაცვის სამინისტროში, სადაზღვევო კომპანიების წარმომადგენლებთან შეხვედრა შედგა. მისი თქმით, შეხვედრის მიზანი მიმდინარე პერიოდში მომატებული დატვირთვის მართვის ეფექტიან მექანიზმებზე შეთანხმება იყო.

„ვიმსჯელეთ გარკვეულ პროცედურულ და ადმინისტრაციულ საკითხებზე. თუ შესაძლებელია რაიმე ადმინისტრაციული და დოკუმენტაციასთან დაკავშირებული სამუშაოს შემსუბუქება, რაც ოჯახის ექიმებს დროს ართმევს, მზად ვართ, ეს საკითხი განვიხილოთ და ეს ყველაფერი ელექტრონულ ფორმატში გადავიტანოთ, რათა ექიმს დროის დაკარგვა არ მოუხდეს. რაც შეეხება გეგმიური ამბულატორიების გადავადებას - ეს უკვე შიდა თემაა. გადაუდებელი ქირურგიული ჩარევები, გადაუდებელი ჰოსპიტალური მომსახურება ვერცერთ შემთხვევაში ვერ გადავადდება. საყოველთაო ჯანდაცვის პროგრამის ფარგლებში, იყო პრეცედენტი, როცა გვქონდა გეგმიური ჰოსპიტალური მომსახურების გადავადების რამდენიმე ეპიზოდი, არ გვქონია ამბულატორიული მომსახურების გადავადების ეპიზოდები, რადგან ამბულატორიული მომსახურება მეტად მართვადია, ექიმისა და პაციენტის კომუნიკაციის რეჟიმში. ამდენად, თავად სადაზღვევო სქემებს შეუძლიათ ამაზე კომუნიკაცია. რა თქმა უნდა, დღეს მთავარია, რესურსი მოხმარდეს, ძირითადად, „ომიკრონის“ მართვას, რადგან, 2 კვირა იქნება თუ 3 კვირა პიკური პერიოდი, ისე გავიაროთ, რომ პაციენტებს ყურადღება არ მოაკლდეთ. თუ გეგმიური ამბულატორია იძლევა გადავადების შესაძლებლობას, ეს შესაძლებელია, განისაზღვროს ინფივიდუალურად, სადაზღვევო სქემის ფარგლებში“, - აღნიშნა თამარ გაბუნიამ.