ლევან დავითაშვილი: „რიონის ხეობის მცველებს“ ვთხოვდი გამოვიყენოთ არსებული პლატფორმა, თუმცა იმისთვისაც მზად ვართ, რომ ნებისმიერ დროს დავსხდეთ პირისპირ და ვისაუბროთ გულწრფელად და ღიად

ლევან დავითაშვილმა „რიონის ხეობის მცველებს“ დიალოგისკენ მოუწოდა. ამ თემაზე ეკონომიკისა და მდგრადი განვითარების მინისტრმა მთავრობის სხდომის შემდეგ გამართულ ბრიფინგზე ისაუბრა. დავითაშვილმა აღნიშნა, რომ უკვე ჩამოყალიბებულია სპეციალურ პლატფორმა, რომლის მუშაობაშიც მთელი რიგი არასამთავრობო ორგანიზაცია მონაწილეობს, მათ შორის მთავრობის წარმომადგენლები.

„სამწუხაროდ, ამ შემთხვევაში ვერ დავინახეთ „რიონის ხეობის მცველების“ ბევრი აქტიურობა და ენთუზიაზმი. პლატფორმა არის და ვთხოვდი, რომ იქნებ გამოვიყენოთ ეს პლატფორმა და არა პირისპირ ვისაუბროთ. თუმცა ამისთვისაც მზად ვართ, რომ ნებისმიერ დროს დავსხდეთ პირისპირ და ვისაუბროთ გულწრფელად და ღიად. მაგრამ თუ კონკრეტულ კითხვებზე გვაინტერესებს პასუხები, მაგალითად უსაფრთხოების, გარემოს ზემოქმედების, ბიომრავალფეროვნების, ტარიფების, ეკონომიკის საკითხებზე, აქ უპრიანია, რომ კონკრეტულ, სწორ ფორმატში დავსხდეთ, რომელშიც ექსპერტები მონაწილეობენ და ის ადამიანები, რომლებსაც ხელეწიფებათ მედიაცია და გარკვეული ნეიტრალური როლის თამაში. ეს არის ევროპის ენერგეტიკული გაერთიანება“, - განაცხადა მინისტრმა.

დღეს საქართველოს ეკონომიკისა და მდგრადი განვითარებისა და გარემოს დაცვისა და სოფლის მეურნეობის სამინისტროებმა გაავრცელეს ერთობლივი განცხადება, რომელშიც აღნიშნულია, რომ კლიმატის ცვლილებისა და ენერგეტიკის ინტეგრირებული გეგმის განხილვაში მონაწილეობა ყველა დაინტერესებულ სპეციალისტს შეუძლია, „რიონის ხეობის მცველები“ მხოლოდ რამდენიმე შეხვედრას დაესწრნენ და უარი თქვეს მასში მონაწილეობაზე.