თეა ახვლედიანი: ჩვენი ეთნიკურად მრავალფეროვანი ქვეყნის საზოგადოების გაძლიერებასა და სამოქალაქო თანასწორობაში, ერთ-ერთი უმთავრესი ფუნდამენტი ქართული ენა და სახელმწიფო ენის ცოდნის ამაღლებაა

სახელმწიფო მინისტრმა, ქართული ენის დღესთან დაკავშირებით, თბილისის საკრებულოში ეთნიკური უმცირესობების წარმომადგენლებთან გამართულ შეხვედრაზე სახელმწიფო ენის დაცვისა და 14 აპრილის დღის მნიშვნელობაზე ისაუბრა. თეა ახვლედიანმა განსაკუთრებული აქცენტი საქართველოს ეთნიკური უმცირესობების წარმომადგენელ თანამოქალაქეებში სახელმწიფო ენის ცოდნის დონის გაუმჯობესების აუცილებლობაზე გააკეთა. სახელმწიფო მინისტრმა აღნიშნა, რომ სწორედ სახელმწიფო ენის ცოდნაა სამოქალაქო თანასწორობისა და ინტეგრაციის პროცესის ფუნდამენტი.

„ჩვენი ეთნიკურად მრავალფეროვანი ქვეყნის საზოგადოების გაძლიერების და სამოქალაქო თანასწორობის პროცესში, ერთ-ერთი უმთავრეს ფუნდამენტი ქართული ენა და სახელმწიფო ენის ცოდნის ამაღლებაა. ქართული ენის დღის აღნიშვნასთან დაკავშირებით, ჩვენ შევხვდით იმ ახალგაზრდებს, რომლებმაც გამოთქვეს მზაობა და სურვილი საკუთარი წვლილი შეიტანონ სახელმწიფო ენის პოპულარიზაციის საქმეში. ისინი აქტიურად ჩაერთნენ ჟვანიას სკოლის „სახელმწიფო ენის ელჩების“ პროგრამაში და წარმატებით მოემზადნენ, რომ შეასრულეს მნიშვნელოვანი მისია, დაეხმარონ არაქართულენოვანი თანამოქალაქეების ქართული ენის შესწავლის პროცესს, რათა მათ შეექმნათ და გაუფართოვდეთ პერსპექტივები პიროვნული და პროფესიული განვითარებისთვის, განათლებისა და დასაქმებისთვის. მე მინდა წარმატება ვუსურვო თითოეულ მათგანს მათ მომავალ საქმიანობაში,“ - განაცხადა სახელმწიფო მინისტრმა თეა ახვლედიანმა.

სახელმწიფო მინისტრმა თეა ახვლედიანმა, განათლების მინისტრ მიხეილ ჩხენკელთან ერთად, პროგრამის კურსდამთავრებულებს სერტიფიკატები გადასცა. მინისტრებთან ერთად ღონისძიებაში მონაწილეობა მიიღეს თბილისის საკრებულოს თავმჯდომარე გიორგი ტყემალაძემ, სახელმწიფო ენის დეპარტამენტის თავმჯდომარე გიორგი ალიბეგაშვილმა და ზურაბ ჟვანიას სახელობის სახელმწიფო ადმინისტრირების სკოლის ხელმძღვანელმა თამარ ჯაყელმა.

სახელმწიფო ენის სწავლებისა და ინტეგრაციის საკითხებში ტრენერთა მომზადება/გადამზადების სასერტიფიკატო პროგრამა – „სახელმწიფო ენის ელჩები“ საქართველოს განათლებისა და მეცნიერების სამინისტროს სსიპ ზურაბ ჟვანიას სახელობის სახელმწიფო ადმინისტრირების სკოლამ განახორციელა. პროგრამის ფარგლებში წინასწარი რეგისტრაციისა და კონკურსის გავლის შედეგად თბილისიდან, ქვემო ქართლის, სამცხე-ჯავახეთისა და კახეთის რეგიონებიდან შეირჩა 20 ტრენერი, რომლებმაც 6 თვიანი, როგორც თეორიული, ასევე, პრაქტიკული გადამზადება გაიარეს სახელმწიფო ენის სწავლებისა და ინტეგრაციის საკითხებში. კურსის დასრულების შემდეგ ისინი ეთნიკური უმცირესობების წარმომადგენლებს სახელმწიფო ენას შეასწავლიან. სასწავლო პროცესი ეთნიკური უმცირესობებით დასახლებულ რეგიონებში ზურაბ ჟვანიას სახელობის სახელმწიფო ადმინისტრირების სკოლის ორგანიზებით წარიმართება.