დეკანოზი ანდრია ჯაღმაიძე: ჩვენი მომლოცველებისთვის ძალიან მნიშვნელოვანია ჩვენი შენაძენი. ვფიქრობთ, თავად ფაქტი ძალიან ბევრი კეთილი ნაყოფის საფუძველი გახდება

ეს არის ისტორიული მოვლენა, როდესაც დიდი ხნის წყვეტის შემდეგ საქართველოს ოფიციალური წარმომადგენლობა საფუძველს იდებს წმინდა მიწაზე, ეს ძალიან მნიშვნელოვანია, - ამის შესახებ საქართველოს საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზი ანდრია ჯაღმაიძემ „ქრონიკაში“ ჩართვისას განაცხადა.

მან კიდევ ერთხელ განმარტა, თუ რა მნიშვნელობა აქვს წმინდა მიწაზე მიწის ნაკვეთის გადმოცემას და ასევე, თუ რატომაა ისტორიული გადაწყვეტილება საქართველოს იქ დაბრუნება.

დეკანოზის თქმით, მას წილად ხვდა პატივი, წმინდა მიწაზე ვიზიტისას საპატრიარქოს მხრიდან დელეგაციის წევრი ყოფილიყო. მამა ანდრიამ განაცხადა, რომ ეს იყო ემოციურად ძალიან დატვირთული და სიხარულით სავსე დღეები.

„ჩვენი ქრისტიანული ისტორია თითქმის, 20 საუკუნეს ითვლის. შეგვიძლია ფაქტების გახსენება იმ დროიდან მოყოლებული, რაც სამყაროში ქრისტიანობის ქადაგება დაიყო. წმინდა მიწასთან ქართულ ეკლესიას, საქართველოს წარმომადგენლებს ძალიან ბევრი რამ აკავშირებს, რომლებიც იქ მოღვაწეობდნენ. ამიტომ, ეს არის ისტორიული მოვლენა, როდესაც დიდი ხნის წყვეტის შემდეგ საქართველოს ოფიციალური წარმომადგენლობა საფუძველს იდებს წმინდა მიწაზე, ეს ძალიან მნიშვნელოვანია. სიმბოლურიცა, რადგან საუკუნეების მანძილზე ქართული ეკლესია იერუსალიმში ძალიან ინტენსიურად იყო წარმოდგენილი. ძალიან ბევრი რამ მაცხოვრის ტაძართან იყო დაკავშირებული, პალესტინაში ძალიან ბევრი ჩვენი მოღვაწე და სასულიერო კერი იყო. ამიტომ, ჩვენი მომლოცველებისთვის ძალიან მნიშვნელოვანია ეს ჩვენი შენაძენი. ვფიქრობთ, თავად ეს ფაქტი ძალიან ბევრი კეთილი ნაყოფის საფუძველი გახდება, რომელიც წმინდა მიწაზე კიდევ ერთი კერის გაჩენას დაუკავშირდება“, - განაცხადა ჯაღმაიძემ.

29 მაისს, იორდანიაში, მაცხოვრის ნათლობის ადგილიდან რამდენიმე მეტრში, საქართველოს 4 ათასი კვ.მ ნაკვეთი ოფიციალურად გადაეცა.