მანანა ძმანაშვილი მიწისძვრებზე: შეშფოთების საგანი მაინც და მაინც არ გვაქვს, იმიტომ რომ ამის გამომწვევი მიზეზები არის ის ტექტონიკური რეალობა, სადაც საქართველოს უწევს არსებობა

ბოლო მონაცემებით, სამების მიმდებარე ტერიტორიაზე 50 მიწისძვრა დაფიქსირდა. სეისმოლოგები არ გამორიცხავენ, რომ დღის განმავლობაში მიწისქვეშა ბიძგები შესაძლოა კიდევ განმეორდეს. სპეციალისტების თქმით, რეგიონში არსებული სეისმური აქტივობა შეშფოთების საგანს არ წარმოადგენს.

„1 წელზე მეტია, რაც ამ რეგიონში გააქტიურებულია სეისმური პროცესები. თუმცა ჯავახეთის ზეგანი ყოველთვის ითვლებოდა ერთ-ერთ აქტიურ სეისმურ კერად, რაჭასთან ერთად. მაგრამ შარშანდელი ზაფხულიდან, უფრო მეტი აქტივობა ფიქსირდება ნამდვილად. შეშფოთების საგანი მაინც და მაინც არ გვაქვს, იმიტომ, რომ ამის გამომწვევი მიზეზები არის ის ტექტონიკური რეალობა, სადაც საქართველოს უწევს არსებობა. ეს არის ევრაზიისა და არაბეთის ფილების შეჯახების რღვევის ადგილი. როგორც დაკვირვება გვიჩვენებს, აქ საშუალო რანგის მიწისძვრებია“, - განაცხადა დედამიწის შემსწავლელ მეცნიერებათა ინსტიტუტისა და სეისმური მონიტორინგის ეროვნული ცენტრის მონაცემთა ბაზებისა და დამუშავების დეპარტამენტის უფროსმა მანანა ძმანაშვილმა.

საქართველოში მიწისქვეშა ბიძგები დღეს რამდენჯერმე დაფიქსირიდა. სეისმური მონიტროინგის ეროვნული ცენტრის ინფორმაციით სამ მაგნიტუდაზე მეტი სიმძლავრის ბიძგები ექვსჯერ განმეორდა.