ირაკლი რუხაძე: ჩემს დასანქცირებას მხოლოდ „იმედის“ გამო ითხოვენ

ტელევიზიამ მეტად გამხვია პოლიტიკაში, ვიდრე მინდა, რომ ვიყო გახვეული, - ამის შესახებ ირაკლი რუხაძემ გადაცემაში „ნოესთან“ განაცხადა. ტელეკომპანია „იმედის“ მფლობელის თქმით, მოთხოვნა მისი დასანქცრების შესახებ სწორედ ტელეკომპანიას უკავშირდება.

„როდესაც „იმედი“ არის ასეთი რეიტინგული არხი და როცა საშუალოდ ქვეყნის მოსახლეობის მეოთხედი მაინც გიყურებს, როდესაც „ქრონიკას“ ანახებ, გინდა-არ გინდა, ეს პოლიტიკაში გრევს. ეს იწვევს უამრავ ვნებათაღელვას - „იმედმა“ ეს თქვა, „იმედმა“ ის თქვა. ბევრ ადამიანს ვიცნობ ამ ქვეყანაში, ურთიერთობა მაქვს უამრავ ადამიანთან, ვიღაც მოგწერს: „ჩემზე ეს რატომ თქვი“. ახლაც, მაგალითად, რომ ითხოვენ რომ დამასანქცირონ, რა თქმა უნდა, ეს მხოლოდ „იმედის“ გამოა. პირდაპირ იძახიან - დაასანქცირეთ, იმიტომ, რომ აკონტროლებს საბანკო სფეროს, რაც არის სიგიჟის იქით. არავინ აკონტროლებს, ეროვნული ბანკი თუ აკონტროლებს და ისიც გაურკვეველია როგორ აკონტროლებს. მე, რა თქმა უნდა, არანაირ საბანკო სფეროს არ ვაკონტროლებ. მეორე, თქვეს, რომ სანქციების წინააღმდეგი ვარ. მე ამერიკის მოქალაქე ვარ და ბევრად უფრო მაღალ დონეზე ვიცავთ ჩვენი კომპანიები სანქციებს, ვიდრე საშუალო ქართული კომპანია. და მესამე, თქვეს რომ „იმედის“ მფლობელიაო. კი, ვარ და ძალიან მეამაყება, რომ ვარ. და ამიტომ უნდა დამასანქცირონ? ნუ, რა თქმა უნდა, ამიტომ, იმიტომ, რომ ბევრს არ მოსწონს „იმედი“. „ნაციონალური მოძრაობის“ წარმომადგენელი ან ყოფილი წარმომადგენელი თუ ხარ არ უნდა მოგწონდეს „იმედი“. ეს სწორია. ამ არხს რაც უყვეს, ესეც საკმარისია , რომ „იმედი“ შენს წინააღმდეგ იყოს და შენ არ მოგეწონება, რომ ყველაზე რეიტინგული არხი, „იმედი“ რომ არსებობს საერთოდ“, - განაცხადა რუხაძემ.