როდის აღდგება სწავლა იმ სკოლების საკლასო ოთახებში, სადაც ინფრასტრუქტურული სამუშაოები მიმდინარეობს. მინისტრის მოადგილის განმარტება

საქართველოს განათლებისა და მეცნიერების მინისტრის პირველმა მოადგილემ, თამარ მახარაშვილმა, „ქრონიკის“ ეთერში, განაცხადა, რომ იმ სკოლებში, სადაც ინფრასტრუქტურული საკითხებია მოსაგვარებელი, სამუშაოების დასრულება 3 ოქტომბრამდე იგეგმება.

„ასეთი 50-მდე სკოლაა, სადაც, კონკრეტულ პერიოდამდე, 3 ოქტომბრამდე, მოუწევს სხვადასხვა სკოლას, დაიწყოს სხვადასხვა მოდელით [სწავლა]. სწორედ იმის გამო, რომ ამ სკოლებს ინფრასტრუქტურული პრობლემები მოუგვარდეთ, 16 სკოლას 3 ოქტომბრამდე, დისტანციურად მოუწევს სასწავლო პროცესის დაწყება, თუმცა, აქაც, ჩვენ შევთავაზეთ ასეთი მოდელი - დაწყებით კლასებზე როცა ვსაუბრობთ და განსაკუთრებით, პირველკლასელებზე, არის შესაძლებლობა, რომ დავიწყოთ პირისპირ ან ჰიბრიდული მეთოდით. აქ საუბარია იმ ინფრასტრუქტურული საკითხების მოგვარებაზე, იმ სკოლებზე, რომლებთანაც დასრულდება ეს პროცესი მაქსიმუმ 3 ოქტომბრამდე“, - განაცხადა თამარ მახარაშვილმა.

მისივე თქმით, იმის გათვალისწინებით, რომ ქვეყანაში 2 000-ზე მეტი საჯარო სკოლაა, შესაბამისი ინფრასტრუქტურული სამუშაოების ჩატარება ყოველწლიურადაა საჭირო.

„აბსოლუტური მზაობაა იმისთვის, რომ ხვალ, 15 სექტემბერს დაწესებულებებში სასწავლო პროცესი დავიწყოთ. ამისთვის, განათლებისა და მეცნიერების სამინისტრომ შესაბამისი მოსამზადებელი სამუშაოები ჩაატარა. წლების განმავლობაში, სკოლების ძალიან დიდ რაოდენობაში მიმდინარეობს ინფრასტრუქტურული პრობლემების მოგვარება, მაგრამ თუ გავითვალისწინებთ, რომ ჩვენს ქვეყანაში 2 086 საჯარო სკოლა გვაქვს, ინფრასტრუქტურული საკითხები მუდმივად რჩება იმ საკითხებად, რომელთა მოგვარებაც ყოველწლიურადაა საჭირო და შესაბამისი გამოწვევების წინაშე ვდგავართ. სწორედ ამ საკითხის გადაწყვეტისთვის, მისი მასშტაბურად და დროულად მოგვარებისთვის, საქართველოს პრემიერ-მინისტრის ინიციატივით, გამოიყო ერთი მილიარდი ლარი, რათა 2026 სასწავლო წლისთვის, 800 სკოლის სრული, მასშტაბური თუ ნაწილობრივი რეაბილიტაცია და, მათ შორის, მშენებლობა შევძლოთ“, - განაცხადა თამარ მახარაშვილმა.

მისივე თქმით, სექტემბერ-ოქტომბერში, 80 ახალი სკოლის მშენებლობისა და 320 სკოლის სრული და ნაწილობრივი რეაბილიტაციისთვის, შესაბამისი ტენდერი ცხადდება.