რას ითვალისწინებს ტაქსების რეფორმის მესამე ეტაპი. დეტალურად

ტაქსების რეფორმის მესამე ეტაპი იწყება - ამ წუთებში თბილისის მერი კახა კალაძე პროექტის პრეზენტაციას მართავს.

თბილისის ტაქსების რეფორმა 2018 წელს დაიწყო. პირველი ეტაპი 2018 წლის 1 ოქტომბრიდან ამოქმედდა და გაიცა 21 000 უკატეგორიო ტაქსის ნებართვა.

2019 წელს განხორციელდა ტაქსების რეფორმის II ეტაპი. 2019 წლის 1 ოქტომბრიდან ძალაში შევიდა რეგულაცია მარჯვენასაჭიანი და განსხვავებული ფერის მანქანების შეზღუდვაზე ტაქსები დაიყო ორ კატეგორიად - A და B. A კატეგორიის ტაქსებზე განისაზღვრა ერთიანი სტანდარტი - თეთრი ფერი და მანათობელი ნიშნები, წარწერით „TAXI თბილისი“ აღნიშნული რეფორმის შედეგად გაიცა შემდეგი ნებართვები:

• A კატეგორია - 19 348 ტაქსი
• B კატეგორია - 7 798 ტაქსი

რეფორმის მესამე ეტაპი ითვალისწინებს:

• ერთწლიანი A კატეგორიის ნებართვების უვადო ნებართვებად გადაქცევას
• A კატეგორიის ნებართვების ბაზრის შექმნას
• A კატეგორიის ნებართვების ყიდვა/გაყიდვის, იჯარით გაცემის და უფლებრივად დატვირთვის შემოღებას
• A კატეგორიის ნებართვის ფასიან აქტივად გადაქცევას
• A კატეგორიის ნებართვების ბაზარზე იურიდიული პირების დაშვებას

2023 წლის 20 მარტიდან შეწყდება არსებული სისტემით A კატეგორიის ნებართვების გაცემა. 2023 წლის 1 აპრილს მუნიციპალიტეტი ერთჯერადად გასცემს ახალი სისტემით (რეფორმის მესამე ეტაპით) გათვალისწინებულ A კატეგორიის ნებართვებს.

მუნიციპალიტეტი 2023 წლის 1 აპრილს ახალი სისტემით (რეფორმის მესამე ეტაპით) გათვალისწინებულ A კატეგორიის ნებართვებს გადასცემს. ყველა ფიზიკურ პირს, რომელიც 2019 წლის 1 ოქტომბრიდან 2023 წლის 20 მარტამდე, ნებისმიერ პერიოდში, ერთხელ მაინც ფლობდა ან აიღებს A კატეგორიის ნებართვას (ერთ ფიზიკურ პირს - ერთი ნებართვა).

2023 წლის 1 აპრილიდან A კატეგორიის ნებართვა მიიღება მხოლოდ შეძენის ან იჯარის უფლებით მიღების გზით იმ პირისგან, რომელიც საკუთრებაში ფლობს A კატეგორიის ნებართვას. A კატეგორიის ნებართვის შეძენა, გასხვისება, იჯარით გაცემა და მიღება, ან უფლებრივად დატვირთვა შეეძლებათ ფიზიკურ და იურიდიულ პირებს.

2023 წლის 1 აპრილიდან ამოქმედდება სრულიად ახალი, თანამედროვე, გამართული ელექტრონული სისტემა taxi.tbilisi.gov.ge სისტემის მეშვეობით ნებართვის მფლობელი შეძლებს მართოს პირადი პროფილი, A და B კატეგორიის ნებართვები, დაკავშირებული მძღოლები და ავტომობილები.

სისტემის მეშვეობით შესაძლებელი იქნება A კატეგორიის ნებართვების ყიდვა/გაყიდვა და იჯარის ფორმით გაცემა.

A კატეგორიის ნებართვის აქტივაცია: 2023 წლის 1 აპრილიდან გაცემული ახალი A კატეგორიის ნებართვა საჭიროებს მიმღების მიერ აქტივაციას. აქტივაციის ვადა განსაზღვრულია 2023 წლის 1 აპრილიდან 2024 წლის 1 აპრილამდე.

A კატეგორიის ნებართვა, რომელიც არ გააქტიურდება დადგენილ ვადაში, ავტომატურად გაუქმდება აღნიშნული ვადის გასვლისთანავე. A კატეგორიის ნებართვის საფასური უცვლელია და დაანგარიშდება დღიურად. ფიზიკურ პირებს, ვისაც არასოდეს აუღიათ A კატეგორიის ნებართვა და ახორციელებენ ან სურვილი აქვთ განახორციელონ A კატეგორიის ბაზარზე ტაქსის მომსახურება, ახალი სისტემით გათვალისწინებული A კატეგორიის ნებართვა გადაეცემათ მხოლოდ იმ შემთხვევაში, თუ 2023 წლის 20 მარტამდე აიღებენ დღეს არსებული სისტემით გათვალისწინებულ A კატეგორიის ნებართვას

2023 წლის 20 მარტამდე გაცემული A კატეგორიის ნებართვა ინარჩუნებს ძალას შესაბამისი ვადით B კატეგორიის ნებართვები და მასთან დაკავშირებული წესები უცვლელია. რეფორმა არ ითვალისწინებს ავტომობილებზე ასაკობრივი შეზღუდვის დაწესებას. რეფორმა არ ითვალისწინებს ტაქსებისთვის რაიმე გადასახადის დაწესებას.