ყალბი ანგარიშებიდან „იმედის“ სახელით ცრუ ინფორმაციები ვრცელდება

„ფეისბუქზე“ შექმნილი ყალბი ანგარიშებიდან „იმედის“ სახელით ცრუ ინფორმაციები ვრცელდება. გთხოვთ ისარგებლოთ ტელეკომპანიის ოფიციალური განცხადებით.

მას შემდეგ, რაც სოციალურ ქსელ „ფეისბუკში“ ტელეკომპანია „იმედის“ ოფიციალურ გვერდზე საჯაროდ წვდომა შეიზღუდა, სოციალურ ქსელებში გამოჩნდა არაერთი გვერდი, რომელიც „ფეისბუკზე” ბოლო საათების განმავლობაში განცხადებებს „იმედის“ სახელით აკეთებს.
არც ერთ მათგანს „იმედთან“ არანაირი შეხება არ აქვს და ყველა არის ყალბი, ე.წ. „ფეიკგვერდი”. „იმედს“ ამ ეტაპზე ახალი გვერდის შექმნის გადაწყვეტილება არ მიუღია, რადგან ტექნოლოგიური კომპანია „მეტას“ ოფიციალურ პასუხს ველოდებით.

შეგახსენებთ, რომ დღეს, 28 ივნისის საღამოს ხუთი საათიდან სოციალურ ქსელ „ფეისბუკში“ ტელეკომპანია „იმედის“ გვერდზე საჯაროდ წვდომა შეზღუდულია. გვერდი ხელმისაწვდომია მხოლოდ მისი ადმინისტრატორებისთვის. საყურადღებოა, რომ არანაირი გაფრთხილება აღნიშნულის შესახებ გვერდს არ მიუღია.

„იმედმა“ ოფიციალური წერილით მიმართა ტექნოლოგიურ კომპანია „მეტას“, თუმცა, კომპანიის ადმინისტრაციაში ამ დრომდე ვერ გვპასუხობენ კითხვაზე, რატომ აღარ არის ხელმისაწვდომი “იმედის” ოფიციალური გვერდი. ჩვენ განგვიმარტეს, რომ “ტელეიმედის” მოთხოვნა გადაცემულია სპეციალური ჯგუფისთვის, რომელიც კომპანიაში მსგავს საკითხებს სწავლობს და ვარაუდობენ, რომ პრობლემის აღმოფხვრა უახლოეს პერიოდში მოხერხდება.

ჩვენი “ფეისბუკგვერდის”აღდგენამდე ახალ ამბებს შეგიძლიათ თვალი ადევნოთ „იმედის“ ვებ-გვერდებზე - „იმედი.ჯი”, „იმედინიუს.ჯი“ და „იმედის“ იუთუბ არხზე.