გიორგი ამილახვარი: ამ დღით მასწავლებლებს არამხოლოდ მადლობას ვეუბნებით, ეს არის პოლიტიკური გზავნილი, რომ თითოეულის პრობლემა არის ჩვენი გულისტკივილი და მზად ვართ ეტაპობრივად, მაგრამ მოკლე ვადებში მათ გამოწვევებს ვუპასუხოთ

დღეიდან ამ დღით [მასწავლებლების დღით] მათ არამხოლოდ მადლობას ვეუბნებით, საზოგადოებაში გვინდა მათი პროფესია გამოვარჩიოთ და ეს არის ასევე პოლიტიკური გზავნილი და სიგნალი, რომ თითოეული მასწავლებლის პრობლემა არის ჩვენი გულისტკივილი და მზად ვართ ეტაპობრივად, მაგრამ მოკლე ვადებში მათ გამოწვევებს ვუპასუხოთ, - ამის შესახებ განათლების და მეცნიერების მინისტრმა გიორგი ამილახვარმა „ქრონიკაში“ განაცხადა.

„დღეს გვაქვს მასწავლებლების ზეიმი. ყველას მინდა, თითოეულ მასწავლებელს, პედაგოგს, მთლიანად საქართველოს მივულოცო მასწავლებლის ეროვნული დღე, რომელიც მთავრობის გადაწყვეტილებით, სიმბოლურად 27 ოქტომბერს, იაკობ გოგებაშვილის დაბადების დღეს დავაწესეთ. დღეს პირველად გვექნება ასეთი აღნიშვნა ოპერისა და ბალეტის თეატრში. ჩვენ ვმასპინძლობთ დღეს ღირსეულ, დამსახურებულ მასწავლებლებს. სპეციალური კომისიის მიერ, რომელიც 21 კაცისგან შედგებოდა, სადაც ყველა პროფესიით ცნობადი, წარმატებული სახეები იყვნენ, 10 საუკეთესო პედაგოგი აირჩა. მიმაჩნია, რომ მსგავსად სხვა ღირსეული და დაფასებული პროფესიებისა, მასწავლებელი, პედაგოგი არის ერთ-ერთი მათგანი, რომელიც ზრუნავს ჩვენს მომავალ თაობებზე და ქმნის ჩვენი ქვეყნის მომავალს და საქართველოს. ამიტომ ამ პროფესიის კიდევ ერთხელ გამოსარჩევად, მადლობის სათქმელად და დასაფასებლად, თუ რა საგმირო მოღვაწეობას ეწევიან ისინი და ეს ნიშნავს ჩვენი გუნდის, მთავრობის გზავნილს, რომ მასწავლებელი დღეს ხდება ჩვენთვის ერთ-ერთი საყურადღებო პროფესია. გვინდა ყველა ის გამოწვევა, პრობლემა, რომლებიც მასწავლებლებს დღეს აქვთ, ძალიან სწრაფად და მყისიერად მოვაგვაროთ. დაწყებული სახელფასო პოლიტიკით, გაგრძელებული კვალიფიკაციის ამაღლებით. დღეიდან ამ დღით [მასწავლებლების დღით] მათ არამხოლოდ მადლობას ვეუბნებით, საზოგადოებაში გვინდა მათი პროფესია გამოვარჩიოთ და ეს არის ასევე პოლიტიკური გზავნილი, რომ ჩვენ უკვე დაწყებული გვაქვს და ეს არის ის სიგნალი, რომ თითოეული მასწავლებლის პრობლემა არის ჩვენი გულისტკივილი და მზად ვართ ეტაპობრივად, მაგრამ მოკლე ვადებში მათ გამოწვევებს ვუპასუხოთ“, - აღნიშნა ამილახვარმა.

საქართველოს მთავრობის გადაწყვეტილებით, 27 ოქტომბერი, იაკობ გოგებაშვილის დაბადების დღე მასწავლებლის ეროვნულ დღედ გამოცხადდა.