გივი მიქანაძე: ჩვენ სკოლაში ვაბრუნებთ ეროვნულ ღირებულებებსა და ფასეულობებს და რა თქმა უნდა, კონკურენტუნარიანი მოქალაქის აღზრდაზე ვართ ორიენტირებული

განათლების, მეცნიერებისა და ახალგაზრდობის მინისტრმა გივი მიქანაძემ განათლების რეფორმის მნიშვნელობისა და მიმართულებების შესახებ „დღის ქრონიკაში“ ისაუბრა.

როგორც მინისტრმა აღნიშნა, მნიშვნელოვანია, რომ საზოგადოება დეტალურად იყოს ინფორმირებული სიახლეების შესახებ.

გივი მიქანაძის თქმით, დღეს წარდგენილ დოკუმენტზე განათლების, მეცნიერებისა და ახალგაზრდობის სამინისტრო რამდენიმე თვის განმავლობაში მუშაობდა.

„მოგეხსენებათ, რომ პრემიერ-მინისტრმა თვენახევრის წინ საჯაროდ წარადგინა უმაღლესი განათლების რეფორმის შესაბამისი კონცეფცია, რომელიც გუშინ მთავრობაზე [სხდომაზე] დავამტკიცეთ. ბუნებრივია, რომ განყენებულად უმაღლესი განათლების რეფორმის განხორციელება შეუძლებელია, თუ არ მოხდა სასკოლო მიმართულების რეფორმირება და პროფესიული მიმართულების გაძლიერება“, - განაცხადა გივი მიქანაძემ.

მისი განმარტებით, დღეს წარდგენილი დოკუმენტი სამუშაო ვერსიაა და მისი ამოსავალი პრინციპი ზოგადი განათლების ეროვნული მიზნების დოკუმენტია.

„ის დაექვემდებარება საჯარო განხილვებს შესაბამის მიზნობრივ ჯგუფებთან იმისთვის, რომ პოზიციები საბოლოოდ შეჯერდეს და ამ დოკუმენტმა თავისი საბოლოო სახე პოვოს, რის შემდეგაც ის მთავრობის მიერ დამტკიცდება.

მთავარი ამოსავალი პრინციპი არის ზოგადი განათლების ეროვნული მიზნების დოკუმენტი. ეს არის ე.წ. სასკოლო კონსტიტუცია, რომელიც 2024 წლის ივნისში პარლამენტმა დაამტკიცა. მას წინ უძღოდა 6-თვიანი მუშაობა, რომელიც ინიციირებული იყო განათლების, მეცნიერებისა და ახალგაზრდობის სამინისტროსა და განათლების, მეცნიერებისა და ახალგაზრდულ საქმეთა საპარლამენტო კომიტეტის ერთობლივი ძალისხმევით“, - განაცხადა მინისტრმა.

მისივე თქმით, აღნიშნულმა დოკუმენტმა 2004 წლის დოკუმენტი შეცვალა.

„იმ დოკუმენტსა და ამ მოქმედ დოკუმენტს შორის არის 180 გრადუსით არსებითი განსხვავება, რამეთუ წინა დოკუმენტი იყო გაჯერებული ლიბერალური ღირებულებებით.

მინდა გითხრათ, რომ ეს დოკუმენტი არის განმსაზღვრელი იმისა, როგორ უნდა წარიმართოს სასკოლო პროცესი, რა ფორმით უნდა იყოს შედგენილი სახელმძღვანელოები, როგორი მეთოდოლოგია უნდა იყოს გამოყენებული. მთლიანად სასკოლო პროცესი ექვემდებარება ამ დოკუმენტს.

ის დოკუმენტი, რომელიც შარშან მივიღეთ, მნიშვნელოვანია იმ კონტექსტიდან გამომდინარე, რომ ჩვენ სკოლაში ვაბრუნებთ ეროვნულ ღირებულებებსა და ფასეულობებს. ვაბრუნებთ გაძლიერებული კომპონენტით სახელმწიფო ენის სწავლებას, საკუთარი ქვეყნის, სამშობლოს ისტორიისა და გეოგრაფიის სწავლებას, კულტურული მემკვიდრეობის დაცვას და რა თქმა უნდა, კონკურენტუნარიანი მოქალაქის აღზრდაზე ვართ ორიენტირებული, რომელსაც სხვადასხვა კომპონენტი უწყობს ხელს და შესაბამისად, ეს ყველაფერი ამიერიდან იქნება განმსაზღვრელი იმ პროცესებისა, რაც სასკოლო რეფორმასთან იქნება დაკავშირებული. სწორედ ამ ძირითად ღირებულებებზე დაფუძნებით შევიმუშავეთ ეს დოკუმენტი“, - განაცხადა მინისტრმა.