ვახტანგ ჟვანია: ქორწინება საქართველოში ერთ-ერთ ტურისტულ მიმართულებად იქცა - თელავშიც გავხსნით ქორწინების სახლს, დაიწყება სიღნაღის ქორწინების სახლის რეაბილიტაცია, მალე თბილისს ექნება რეაბილიტირებული კონკის ქორწინების სახლი

იუსტიციის სახლის თავმჯდომარემ გადაცემაში „დღის ქრონიკა“ ქორწინების სერვისის მნიშვნელობასა და მისი განვითარების გეგმებზე ისაუბრა. როგორც ვახტანგ ჟვანიამ აღნიშნა, ქორწინების სერვისს იუსტიციის სახლი განსაკუთრებული ყურადღებას უთმობს.

„ქორწინება საქართველოში ერთ-ერთ ტურისტულ მიმართულებად იქცა იმიტომ, რომ ჩვენთან ქორწინება რთულ პროცედურებთან არ არის დაკავშირებული და მარტივია. თითქმის, ყველა რეგიონში და დასახლებულ პუნქტში ხელმისაწვდომია, რადგან იუსტიციის სახლს გააჩნია გასვლითი ქორწინების სერვისი და ნებისმიერ წერტილში მარტივად ხელმისაწვდომი პროცესია“, - განაცხადა ვახტანგ ჟვანიამ.

მან ქორწინების სახლების რაოდენობის ზრდის, ასევე რამდენიმე ქორწინების სახლის რეაბილიტაციის გეგმებზეც ისაუბრა.

„რაც შეეხება ქორწინების სახლების რაოდენობის ზრდას, ამ მიმართულებითაც გვაქვს სიახლეები. კახეთის მხარის გუბერნატორთან, რეგიონული განვითარების, ინფრასტრუქტურის სამინისტროებთან ერთად თელავში ძალიან მალე გადმოგვეცემა ქორწინებისთვის საჭირო სივრცე და იქაც გავხსნით ქორწინების სახლს.

ასევე აქტიურად დაიწყება სიღნაღის ქორწინების სახლის რეაბილიტაცია. როგორც კი ეს პროცესი დასრულდება, სიღნაღში ხელმისაწვდომი იქნება ქორწინების 24-საათიანი მომსახურება, რაც განსაკუთრებით მნიშვნელოვანია, ალბათ ტურისტებისთვის.

ერთი მნიშვნელოვანი სიახლე, რომელსაც თბილისის მერიასთან ერთად ვახორციელებთ და მინდა, თბილისის მერიას განსაკუთრებული მადლობა გადავუხადო, არის კონკის ქორწინების სახლის რეაბილიტაცია. ძალიან მალე თბილისს ექნება რეაბილიტირებული კონკის ქორწინების სახლი, რაც დარწმუნებული ვარ, როგორც საქართველოს მოქალაქეებისთვის, ისე ტურისტებისთვისაც საინტერესო ლოკაცია იქნება.

გეგმაში გვაქვს და მალე დავაანონსებთ სიახლეებს ტურისტულად აქტიურ რეგიონებში ქორწინების სივრცეებისა და სახლების გახსნის კუთხით. ასევე გვინდა, ქორწინების სერვისშიც სიახლეები შევიტანოთ და შევთავაზოთ საზოგადოებას”, - აღნიშნა იუსტიციის სახლის თავმჯდომარემ.