კობა კობალაძემ „ლივ ჰოსპიტალის“ საერთაშორისო დეპარტამენტის დირექტორთან შეხვედრა გამართა

ვეტერანების საქმეთა სახელმწიფო სამსახურის დირექტორმა, გენერალ-მაიორმა კობა კობალაძემ ულტრათანამედროვე საავადმყოფოების ქსელის_ „ლივ ჰოსპიტალის’’ (Liv Hospital) საერთაშორისო დეპარტამენტის დირექტორს, სევინჩ ნურ გუმუშბოღასა და Liv Hospital-ის საქართველოსა და აზერბაიჯანის დეპარტამენტის ხელმძღვანელს, ლუკა ბოლქვაძეს უმასპინძლა.

შეხვედრის მიზანი, მხარეთა შორის თანამშრომლობის განვითარების პერსპექტივები და, სამომავლოდ, ვეტერანებზე მორგებული სამედიცინო პროგრამების ერთობლივი ძალისხმევით შემუშავება გახლდათ.

კობა კობალაძემ სტუმრებს გააცნო ის სამედიცინო პროექტები, რომელთაც, სამსახური, სახელმწიფოს მხარდაჭერით ახორციელებს ვეტერანთა ჯანდაცვის მდგომარეობის გასაუმჯობესებლად; ისაუბრა სარეაბილიტაციო პროგრამების განვითარების აუცილებლობაზეც. ხაზი გაესვა, ასევე, იმ გამოწვევებსაც, რომლებიც ჯერ კიდევ არსებობს და რომელთა დაძლევაშიც, საერთაშორისო პარტნიორების მხარდაჭერა მნიშვნელოვანია: „ჩვენ, თურქეთის მხარესთან, წლების განმავლობაში, ძალიან ნაყოფიერი და შედეგზე ორიენტირებული თანამშრომლობა გვაკავშირებს როგორც სოფლის მეურნეობის, ისე, სამედიცინო სფეროში; მოხარული ვიქნებით, თუ ეს თანამშრომლობა, თქვენთან ურთიერთობის განვითარებით, კიდევ უფრო გაღრმავდება, რაც ჩვენი ბენეფიციარების წინაშე ჯანდაცვის კუთხით არსებული გამოწვევების გადალახვის გზაზე, წინგადადგმული ნაბიჯი იქნება,’’-განაცხადა სამსახურის დირექტორმა.

სტუმრებმა ისაუბრეს იმ უპირატესობებსა და სამედიცინო მიღწევებზე, რასაც Liv Hospital-მა მიაღწია და რითაც თავისი კუთვნილი ადგილი დაიმკვიდრა მსოფლიოში. აღნიშნეს ქართულ მხარესთან, კერძოდ, ვეტერანების საქმეთა სახელმწიფო სამსახურთან ურთიერთობის განვითარებაზე და აღნიშნეს, რომ თანამშრომლობის შემთხვევაში, სამსახურის ბენეფიციართათვის, განსაკუთრებულ პაკეტებს შეიმუშავებენ, რაც, ვეტერანთათვის, სამედიცინო მომსახურებას უფრო მოქნილსა და ხელმისაწვდომს გახდის. დაინტერესების შემთხვევაში, შესაძლებელი იქნება, ასევე, სამედიცინო პერსონალის გადამზადება და სამომავლოდ, ვეტერანთა მრავალპროფილური ჰოსპიტლის პროექტზე მუშაობაც.

შეხვედრის დასასრულ, მხარეები შეთანხმდნენ ურთიერთთანამშრომლობის გზების დასახვასა და პარტნიორული ურთიერთობის განვითარებისთვის ერთობლივ ძალისხმევაზე.

შეხვედრას, ასევე, ესწრებოდნენ ვეტერანების საქმეთა სახელმწიფო სამსახურის დირექტორის პირველი მოადგილე, ნიკოლოზ კვეზერელი და დირექტორის მოადგილე, ჯანდრი უბირია.

ინფორმაციისთვის, დღეისათვის, Liv-ის საავადმყოფოთა ქსელი 6 სამედიცინო ცენტრს აერთიანებს, რომლებიც თურქეთის ყველაზე დიდ ქალაქებში: სტამბოლში, ანკარაში, სამსუნსა და გაზიანთეფში მდებარეობს. მხოლოდ თურქეთში, 36 კლინიკასა და 2 საერთაშორისო უნივერსიტეტს ფლობს. Liv-ის საავადმყოფოთა ქსელს ფილიალები აქვს, ასევე, თურქეთის ფარგლებს გარეთაც_ლონდონში, დუბაიში, ბუდაპეშტსა და ბაქოში. კლინიკები ყველა სამედიცინო მიმართულებით მუშაობს და მიღებული აქვს JCI-ს და ISO 9001-ის აკრედიტაციები, რაც „ლივ ჰოსპიტალის’’, როგორც საერთაშორისო დონის სამედიცინო ცენტრების სტატუსს ადასტურებს. ამასთან „ლივს’’ დამოუკიდებელი საერთაშორისო კომისიისგან Surgical Review Corporation (SRC) რობოტულ ქირურგიაში, კოლორექტალურ ქირურგიასა და ბარიატრიულ ქირურგიაში აკრედიტაცია აქვს მინიჭებული. აქ, ოპერაციები, ისეთი თანამედროვე ტექნოლოგიების გამოყენებით ტარდება, როგორებიცაა რობოტი-ქირურგი „და ვინჩი“, TrueBeamSTx-ის აპარატი და MAKOplasty-ს სისტემა. განსაკუთრებული მიღწევები აქვს გაფანტული სკლეროზის, დემენციისა და აუტიზმის მკურნალობის სფეროში.