26 მაისს, გარემოს დაცვისა და სოფლის მეურნეობის სამინისტროს დაცული ტერიტორიების სააგენტო ქალაქ ფოთის ცენტრალურ მოედანზე სტუმრებს მრავალფეროვანი, შემეცნებით-გასართობი პროგრამით უმასპინძლებს

26 მაისს, საქართველოს მთავრობის ორგანიზებით, გარემოს დაცვისა და სოფლის მეურნეობის სამინისტროს დაცული ტერიტორიების სააგენტო ქალაქ ფოთის ცენტრალურ მოედანზე სტუმრებს მრავალფეროვანი, შემეცნებით-გასართობი პროგრამით უმასპინძლებს.

ღონისძიება 11:00 საათიდან 18:00 საათამდე გაგრძელდება და მოიცავს მუსიკალურ და თეატრალურ წარმოდგენებს.

წელს საქართველოს დამოუკიდებლობის დღის აღნიშვნა განსაკუთრებულ კონცეფციას ეფუძნება - „1700 წელია რწმენა გვაძლიერებს, სიყვარული გვაერთიანებს“, რაც ქრისტიანობის სახელმწიფო რელიგიად გამოცხადებიდან 1700 წლის იუბილეს ეხმიანება.

დღის განმავლობაში ცენტრალურ მოედანზე მოეწყობა მრავალფეროვანი საგანმანათლებლო, კულტურული, შემეცნებითი და გასართობი სივრცეები, სადაც დამთვალიერებლები საქართველოს დაცულ ტერიტორიებს განსხვავებული, ინტერაქციული ფორმით გაეცნობიან.

17:10 საათზე, იმ ისტორიულ წუთზე, როდესაც 1918 წელს საქართველოს დამოუკიდებლობა გამოცხადდა, შესრულდება საქართველოს ეროვნული ჰიმნი.

საზეიმო ღონისძიება დასრულდება გალა-კონცერტით, რომელშიც მონაწილეობას მიიღებენ რომა რცხილაძე, მარიამ მამისმედიშვილი, თამთა ჭელიძე, ქეთი გომართელი, თამუნა ამონაშვილი და ბენდი, ლევან ყანდიაშვილი, თაკო მელიქიშვილი, ენრიკო ჯანელიძე, მანანა თოდაძე, თიკა ბალანჩინი და ბენდი „ნიუტონი“.