პრემიერი: ჩვენ გავაკეთეთ ძალიან მკაფიო განცხადება შეწყალებასთან დაკავშირებით, ეს წინადადება სათანადოდ მიიღეს კონკრეტულმა პატიმრებმა, აღიარეს დანაშაული და მათთან გაფორმდა საპროცესო შეთანხმება, იმისთვის, რომ ახალი ძალადობა არ იყოს წახალისებული, მნიშვნელოვანია, სამართალი აღსრულდეს

ჩვენ გავაკეთეთ ძალიან მკაფიო განცხადება შეწყალებასთან დაკავშირებით და ზოგადად პატიმრების მიმართ მიდგომებთან დაკავშირებით. ჩვენ განვაცხადეთ, რომ თუ იქნება სინანული დანაშაულთან მიმართებით, თუ იქნება შესაბამისი მიმართვა, ჩვენ მზად ვართ, შესაბამისი რეაგირება იყოს ამ ყველაფერზე, - განაცხადა საქართველოს პრემიერ-მინისტრმა ირაკლი კობახიძემ 4 ოქტომბრის საქმეზე დაკავებულებთან დაკავშირებული კითხვის საპასუხოდ.

როგორც მთავრობის მეთაურმა აღნიშნა, ეს წინადადება სათანადოდ მიიღეს კონკრეტულმა პატიმრებმა.

„მათ შესაბამისად, აღიარეს ჩადენილი დანაშაული და შესაბამისად, გაფორმდა მათთან საპროცესო შეთანხმება. ძალიან კარგი იქნება, სხვა პატიმრებიც თუ მიბაძავენ ამ ადამიანებს, მათ შორის აღიარების კუთხით, მათ შორის საქართველოს პრეზიდენტისადმი შეწყალებაზე მიმართვის კუთხით. ჩვენ შეგვიძლია აქედანვე რა თქმა უნდა, პრეზიდენტთან შეთანხმებით, კიდევ ერთხელ გავცეთ პირობა იმასთან დაკავშირებით, რომ შესაბამისი მიმართვის, აღიარების და სინანულის შემთხვევაში, ხელისუფლებას ექნება შესაბამისი რეაგირება. ეს არის მნიშვნელოვანი დანაშაულის პრევენციისთვის.

გახსოვთ, რომ 2023 წელს იყო სისტემური ძალადობა სახელმწიფო ინსტიტუტებზე თავდასხმა, მაშინ ერთი პირი იყო მხოლოდ დაკავებული, ისიც შეიწყალა შემდეგ ყოფილმა პრეზიდენტმა. შემდეგ ექვსი პირი იყო დაკავებული, ამან პრევენციული ეფექტი არ იქონია, პირიქით, წაახალისა ახალი ძალადობა. იმისათვის, რომ ახალი ძალადობა არ იყოს წახალისებული, მნიშვნელოვანია, სამართალი აღსრულდეს. კიდევ ერთხელ თუ იქნება აღიარება, რა თქმა უნდა ჩვენ გვექნება შესაბამისი რეაგირება და ამაზე კიდევ ერთხელ შემიძლია პირობა დავდო“, - განაცხადა ირაკლი კობახიძემ.